పదవీ విరమణ వయస్సు పెంపు ప్రభుత్వ నిర్ణయమే: హైకోర్టు

పదవీ విరమణ వయస్సు పెంపు విషయంలో కోర్టులు జోక్యం చేసుకోరాదని తెలంగాణ హైకోర్టు స్పష్టం చేసింది. జస్టిస్ కే శరత్ ఈ మేరకు తీర్పు వెలువరించారు. యూనివర్సిటీల ప్రొఫెసర్ల పదవీ విరమణ వయస్సును 60 నుంచి 65 ఏళ్లకు పెంచిన ప్రభుత్వ నిర్ణయాన్ని సవాల్ చేస్తూ దాఖలైన 13 పిటిషన్లను ఆయన కొట్టివేశారు.

గతేడాది రాష్ట్ర ప్రభుత్వం జారీ చేసిన జీవోలో ఉన్నత విద్యామండలి పరిధిలోని యూనివర్సిటీల ప్రొఫెసర్లకు పదవీ విరమణ వయస్సు పెంచాలని నిర్ణయించారు. ప్రొఫెసర్ జయశంకర్ తెలంగాణ వ్యవసాయ విశ్వవిద్యాలయం, పీవీ నరసింహారావు తెలంగాణ వెటర్నరీ విశ్వవిద్యాలయం, కొండా లక్ష్మణరావు బాపూజీ తెలంగాణ హార్టికల్చర్ విశ్వవిద్యాలయాల బోధనా సిబ్బంది తమకూ ఈ జీవో వర్తింపజేయాలంటూ పిటిషన్లు వేశారు.

విచారణ సందర్భంగా జస్టిస్ శరత్, ప్రతి ఉద్యోగానికీ స్వంత నిబంధనలుంటాయని, ఒకే రకమైన పనిచేస్తున్నామంటూ ఇతరులతో సమాన హక్కులు కోరలేరని అభిప్రాయపడ్డారు. సేవల కొనసాగింపు విషయంలో కోర్టులు సమయోచితంగా వ్యవహరించాలని సుప్రీంకోర్టు ఇచ్చిన పలు తీర్పులను ప్రస్తావించారు. అందువల్ల ప్రభుత్వ విధాన నిర్ణయంలో జోక్యం చేసుకోలేమని పిటిషన్లను కొట్టివేసినట్లు తెలిపారు.