తెలంగాణలో మండుటెండలు: IMD రెడ్, ఆరెంజ్ అలర్ట్ జారీ

తెలంగాణ రాష్ట్రం heat core zone లో ఉందని హైదరాబాద్ వాతావరణ కేంద్రం హెచ్చరించింది. IMD అధికారి ధర్మరాజు ప్రకారం, రాష్ట్రవ్యాప్తంగా పలు జిల్లాలకు రెడ్ మరియు ఆరెంజ్ అలర్ట్‌లు జారీ చేశారు.

ఉత్తర తెలంగాణలో ఉష్ణోగ్రతలు అధికంగా నమోదవుతున్నాయి. ఆదిలాబాద్‌లో 45°C వరకు, నిజామాబాద్‌లో 44°C వరకు, మెదక్ మరియు రామగుండంలో 42°C వరకు ఉష్ణోగ్రతలు నమోదయ్యాయి. హైదరాబాద్ నగరంలో 40°C వరకు, శివారు ప్రాంతాల్లో 39-40°C వరకు ఉష్ణోగ్రతలు కొనసాగుతున్నాయి.

మే 22వ తేదీ వరకు ఆదిలాబాద్, కొమురంభీమ్, మంచిర్యాల, నిర్మల్, జగిత్యాల జిల్లాల్లో ఉష్ణోగ్రతలు 45°C కంటే ఎక్కువగా ఉండే అవకాశం ఉందని IMD పేర్కొంది. నల్గొండ, సూర్యాపేట, భద్రాద్రి కొత్తగూడెం జిల్లాల్లో కూడా ఉష్ణతీవ్రత పెరుగుతుందని అంచనా వేస్తున్నారు. మిగిలిన జిల్లాల్లో 41-44°C మధ్య ఉష్ణోగ్రతలు నమోదవుతాయని తెలిపారు.

నైరుతి రుతుపవనాల విషయంలో, మే 16న అండమాన్ నికోబార్ దీవులను తాకిన పవనాలు ఇప్పుడు తూర్పు మధ్య బంగాళాఖాతం వరకు వ్యాపించాయి. ఈ నెల 26 నాటికి కేరళ తీరాన్ని తాకే అవకాశం ఉందని IMD అంచనా వేస్తోంది.

తదుపరి ఐదు రోజుల పాటు భారీ ఉష్ణతలు కొనసాగుతాయని IMD అధికారులు హెచ్చరించారు. అవసరమైతేనే బయటకు రావాలని, జాగ్రత్తగా ఉండాలని ప్రజలకు సూచించారు.