తెలంగాణలో 19 జిల్లాలకు రెడ్ అలర్ట్ — నిర్మల్‌లో 46.5° నమోదు

తెలంగాణలో వేసవి తీవ్రత పెరిగింది. బుధవారం 19 జిల్లాల్లో 46 డిగ్రీల సెల్సియస్ పైగా ఉష్ణోగ్రతలు నమోదయ్యాయి. వాతావరణ శాఖ అధికారులు ఆ జిల్లాలకు రెడ్ అలర్ట్ జారీ చేశారు.

నిర్మల్ జిల్లా దిలావర్‌పూర్‌లో అత్యధికంగా 46.5°C నమోదైంది. హనుమకొండ జిల్లా ధర్మసాగర్, కరీంనగర్ జిల్లా చొప్పదండి, పెద్దపల్లి జిల్లా ఓదేల ప్రాంతాల్లో 46.4°C నమోదైంది.

రెడ్ అలర్ట్ జారీ అయిన జిల్లాలు: నిర్మల్, హనుమకొండ, కరీంనగర్, పెద్దపల్లి, జగిత్యాల, జనగామ, ఖమ్మం, కుమురం భీమ్ ఆసిఫాబాద్, మంచిర్యాల, నిజామాబాద్, ఆదిలాబాద్, భద్రాద్రి కొత్తగూడెం, మహబూబాబాద్, సిద్దిపేట, సూర్యపేట, ములుగు, సిరిసిల్ల, నల్గొండ, వరంగల్.

హైదరాబాద్‌లో 40°C నుంచి 44°C వరకు ఉష్ణోగ్రతలు నమోదవుతున్నాయి. పశ్చిమ తెలంగాణలో సంగారెడ్డి, వికారాబాద్ జిల్లాల్లో 42°C నుంచి 45°C వరకు ఉంటున్నాయి.

మధ్యాహ్నం 11 గంటల నుంచి సాయంత్రం 4 గంటల వరకు ఇంటి నుంచి బయటకు రావద్దని వాతావరణ శాఖ సూచించింది. నీళ్లు తగినంత తాగాలని కూడా హెచ్చరించింది. వడదెబ్బ బాధితులకు సహాయం చేసేందుకు ప్రభుత్వ ఆస్పత్రుల్లో ఏర్పాట్లు చేసినట్లు రాష్ట్ర ప్రభుత్వం GO జారీ చేసింది.

రానున్న మూడు నుంచి నాలుగు రోజులు ఎండ తీవ్రత ఇదే స్థాయిలో కొనసాగే అవకాశం ఉందని వాతావరణ శాఖ తెలిపింది. ఉత్తరప్రదేశ్‌లోని బాందా జిల్లాలో మంగళవారం 48.2°C నమోదై దేశంలోనే అత్యంత వేడి ప్రాంతంగా నిలిచింది.