తెలంగాణలో ఎండల తీవ్రత: 7 జిల్లాలకు రెడ్ అలర్ట్, వడదెబ్బతో బాలుడు మృతి

కొమరంభీం ఆసిఫాబాద్ జిల్లా లోహరాలో వడదెబ్బతో ఒక బాలుడు మృతి చెందాడు. మామిడికాయలు తెంపడానికి వెళ్లిన ముగ్గురు పిల్లల్లో ఒకరు చనిపోగా, మిగతా ఇద్దరు అస్వస్థతకు గురయ్యారు. వారికి మంచిరాల ప్రభుత్వ ఆసుపత్రిలో చికిత్స అందిస్తున్నారు.

IMD రేపటికి ఆదిలాబాద్, కొమరంభీం ఆసిఫాబాద్, నిర్మల్, నిజామాబాద్, జగిత్యాల, మంచిరాల, రాజన్న సిరిసిల్ల జిల్లాలకు రెడ్ అలర్ట్ జారీ చేసింది. మరో 22 జిల్లాలకు ఆరెంజ్ అలర్ట్ ఇచ్చింది. ఆరెంజ్ అలర్ట్ జిల్లాల్లో గరిష్ట ఉష్ణోగ్రతలు 41 నుంచి 44 డిగ్రీల మధ్య నమోదవుతాయని తెలిపింది.

ఈ రోజు నిర్మల్ జిల్లా తానూరులో 45.8°C అత్యధిక ఉష్ణోగ్రత నమోదైంది. ఆదిలాబాద్ జిల్లా భోరస్‌లో 45.5°C, నిజామాబాద్ జిల్లా భీమగల్‌లో 45.3°C నమోదయ్యాయి. రాష్ట్రంలో మిగతా అన్ని ప్రాంతాల్లో 40°C పైనే ఉష్ణోగ్రత నమోదైంది.

వచ్చే నాలుగైదు రోజుల్లో ఉష్ణోగ్రతలు మరో 2 నుంచి 4 డిగ్రీలు పెరిగే అవకాశం ఉందని IMD అధికారులు తెలిపారు. ముఖ్యంగా ఉత్తర తెలంగాణ, దక్షిణ తెలంగాణలో ఎండ తీవ్రత అధికంగా ఉంటుందని పేర్కొన్నారు. అత్యవసరమైతే తప్ప ఎండలో బయటకు వెళ్లొద్దని సూచించారు.

నైరుతి రుతుపవనాలు మే 26న కేరళాలో ప్రవేశించే అవకాశం ఉందని IMD తెలిపింది. జూన్ 5న ఆంధ్రప్రదేశ్‌ను, జూన్ 12 వరకు తెలంగాణను తాకే అవకాశం ఉందని పేర్కొంది.