తెలంగాణలో వడగాలుల హెచ్చరిక: సగం రాష్ట్రంలో రెడ్ అలర్ట్

తెలంగాణలో వడగాలులు తీవ్రంగా ఉన్నాయి. అధికారులు రానున్న మూడు రోజులు అప్రమత్తంగా ఉండాలని ప్రజలకు హెచ్చరిక జారీ చేశారు. అత్యవసరమైతే తప్ప ఇళ్ల నుంచి బయటకి రావద్దని సూచిస్తున్నారు.

కొమరంభీమ్ ఆసిఫాబాద్, మంచిర్యాల, పెద్దపల్లి, జయశంకర్ భూపాలపల్లి, కరీంనగర్, ములుగు జిల్లాలతో సహా తూర్పు తెలంగాణలోని అనేక జిల్లాలకు రెడ్ అలర్ట్ జారీ అయింది. పశ్చిమ తెలంగాణ జిల్లాలకు ఆరెంజ్ అలర్ట్ కొనసాగుతోంది.

రేపు పరిస్థితి ఇంకా తీవ్రంగా ఉంటుందని, రెడ్ అలర్ట్ ఏరియాలు పెరుగుతాయని అధికారులు పేర్కొన్నారు. ఎల్లుండి నాటికి యాదాద్రి భువనగిరి, సిద్దిపేట, రాజన్న సిరిసిల్ల జిల్లాల్లో రెడ్ అలర్ట్ నుంచి ఆరెంజ్ అలర్ట్‌కు తగ్గే అవకాశం ఉందని అంచనా వేస్తున్నారు.