తెలంగాణలో భారీ వర్షాలు.. నాలుగు జిల్లాలకు రెడ్ అలర్ట్

తుఫాను ప్రభావంతో తెలంగాణలోని పలు జిల్లాల్లో వర్షాలు ప్రారంభమయ్యాయి. ఇవాళ ఉమ్మడి వరంగల్, ఖమ్మం, నల్గొండ, మహబూబ్‌నగర్ జిల్లాల్లో ఉరుములు, మెరుపులు, ఈదురుగాలులతో కూడిన భారీ వర్షాలు కురుస్తాయని వాతావరణ శాఖ హెచ్చరించింది.

రేపు ములుగు, కొత్తగూడెం, ఖమ్మం, మహబూబాబాద్ జిల్లాల్లో అతి భారీ వర్షాలు కురిసే అవకాశం ఉంది. ఈ జిల్లాలకు వాతావరణ శాఖ రెడ్ అలర్ట్ జారీ చేసింది. మరికొన్ని జిల్లాలకు ఆరెంజ్ అలర్ట్ ఇచ్చింది. ప్రజలు అప్రమత్తంగా ఉండాలని హెచ్చరించింది.

తుఫాను గాలుల వేగం గంటకు 100 నుంచి 140 కిలోమీటర్లు ఉండొచ్చని వాతావరణ శాఖ తెలిపింది. ప్రస్తుతం గంటకు 117 నుంచి 125 కిలోమీటర్ల వేగంతో గాలులు వీస్తున్నాయి. తుఫాను రేపు ఉదయం బాపట్ల, విశాఖపట్నం మధ్య తీరం దాటే అవకాశం ఉంది.

ఖమ్మం జిల్లాలో మంత్రి తుమ్మల నాగేశ్వరరావు కలెక్టరేట్‌లో అధికారులతో సమీక్ష నిర్వహించారు. రెవెన్యూ, మున్సిపల్, గ్రామీణ అధికారులు అప్రమత్తంగా ఉండాలని ఆయన చెప్పారు. లోతట్టు ప్రాంతాల ప్రజలను అప్రమత్తం చేస్తున్నారు. వాగులు, వంకలు పొంగిపోయే అవకాశం ఉందని అధికారులు చెబుతున్నారు.

ఉరుములు, మెరుపులతో వర్షాలు పడే సమయంలో పిడుగులు పడే ప్రమాదం ఉంది. రైతులు, వ్యవసాయ కూలీలు జాగ్రత్తగా ఉండాలని అధికారులు సూచిస్తున్నారు. రేపు ఉదయం నుంచి ఎల్లుండి ఉదయం వరకు తెలంగాణలో భారీ వర్షాలు కురిసే అవకాశం ఉంది.