తెలంగాణకు భారీ వర్ష హెచ్చరిక: దక్షిణ జిల్లాలకు ఎల్లో అలర్ట్

ఇవాళ సాయంత్రం నుంచి తెలంగాణలో భారీ వర్షాలు కురుస్తాయని హైదరాబాద్ వాతావరణ శాఖ అధికారులు తెలిపారు. హైదరాబాద్, ఉత్తర తెలంగాణ జిల్లాలతో పాటు దక్షిణ తెలంగాణలో కూడా వర్షాలు పడతాయని సూచించారు.

రాబోయే మూడు రోజుల్లో తెలంగాణలోని అనేక జిల్లాల్లో ఉరుములు, మెరుపులతో కూడిన భారీ వర్షాలు కురిసే అవకాశం ఉందని హైదరాబాద్ వాతావరణ కేంద్రం తెలిపింది. హైదరాబాద్, ఆదిలాబాద్, భద్రాద్రి కొత్తగూడెం, హనుమకొండ, జయశంకర్ భూపాలపల్లి, జగిత్యాల, ఖమ్మం, మహబూబ్ నగర్, మంచిర్యాల, నల్గొండ, రంగారెడ్డి, సూర్యపేట, వికారాబాద్, వరంగల్, వనపర్తి, కొమరంబీం ఆసిఫాబాద్, మహబూబాబాద్, మెడ్చల్ మల్కాజగిరి, నాగర్ కర్నూల్ ప్రాంతాల్లో భారీ వర్షాలు పడతాయని హెచ్చరించింది. ఈ సమయంలో గంటకు 30 నుంచి 40 కిలోమీటర్ల వేగంతో బలమైన ఈదురుగాలులు కూడా వీచే అవకాశం ఉందని అధికారులు తెలిపారు.

దక్షిణ తెలంగాణ జిల్లాలైన హైదరాబాద్, రంగారెడ్డి, మెడ్చల్ మల్కాజగిరి, వికారాబాద్, సంగారెడ్డి, మహబూబ్నగర్, నాగర్ కర్నూల్, వనపర్తి, నారాయణపేట, జోగులాంబ గద్వాల జిల్లాలకు ఎల్లో అలర్ట్ జారీ చేసింది. మరోవైపు ఉత్తర తెలంగాణ జిల్లాలైన నిజామాబాద్, ఆదిలాబాద్, కరీంనగర్ ప్రాంతాలకు ఇంకా నైరుతి రుతుపవనాలు ప్రవేశించలేదు. దీంతో అక్కడ ఎండ తీవ్రత కొనసాగుతోంది. రామగుండంలో ఆదివారం 42.5 డిగ్రీల సెల్సియస్ ఉష్ణోగ్రత నమోదు కాగా, పలు జిల్లాల్లో 40 డిగ్రీల పైనే ఉంది.

ఈసారి ఎల్నినో ప్రభావంతో నైరుతి రుతుపవనాల వేగం తగ్గిందని, దీంతో రాష్ట్రంలో ఆశించినంత వర్షం పడే అవకాశం తక్కువగా ఉందని ఐఎండీ తెలిపింది. ఇప్పటికే జూన్ 1 నుంచి అనుకున్న స్థాయిలో వర్షపాతం నమోదు కాలేదు. దీంతో పత్తి పంట విత్తిన రైతులు వర్షం కోసం ఎదురు చూస్తున్నారు. భూగర్భ జలం కూడా తగ్గిపోవడంతో రైతులు ఆందోళన చెందుతున్నారు.

హైదరాబాద్లో భారీ వర్షం పడే అవకాశం ఉండటంతో అధికారులు అప్రమత్తంగా ఉండాలని, సహాయక చర్యలు చేపట్టాలని ముఖ్యమంత్రి రేవంత్ రెడ్డి ఆదేశాలు జారీ చేశారు.