స్వచ్ఛంద వ్యభిచారం నేరం కాదు; కస్టమర్లపై ట్రాఫికింగ్ కేసు చెల్లదు: తెలంగాణ హైకోర్టు

తెలంగాణ హైకోర్టు స్వచ్ఛంద వ్యభిచారం నేరం కాదని కీలక తీర్పు ఇచ్చింది. స్వచ్ఛందంగా వ్యభిచారం చేస్తున్న మహిళల కస్టమర్లపై మానవ అక్రమ రవాణ చట్టం కింద కేసు నమోదు చేయడానికి వీలు లేదని స్పష్టం చేసింది.

బ్రోకర్లు, మధ్యవర్తులు లేదా వ్యభిచార గృహాల నిర్వాహకుల ప్రమేయం ఉంటే మాత్రం మహిళను బాధితురాలిగా పరిగణించి సంబంధిత వ్యక్తులపై కేసు నమోదు చేయవచ్చని హైకోర్టు వివరించింది. ఒక మహిళ అక్రమ రవాణకు గురైన బాధితురాలని తెలిసి, నమ్మదగిన కారణాలు ఉండి, ఆమెను లైంగిక దోపిడీకి వినియోగిస్తే ఐపీసీ సెక్షన్ 370A(2) వర్తిస్తుందని తీర్పు చెప్పింది.

ఐపీసీ సెక్షన్లు 370, 370A (ప్రస్తుతం బీఎన్ఎస్ సెక్షన్లు 143, 144) ట్రాఫికింగ్ చేసే వ్యక్తులను శిక్షించేందుకు తీసుకొచ్చినవని, ఇవి స్వచ్ఛంద సెక్స్ వర్కర్ల కస్టమర్లకు వర్తించవని హైకోర్టు తెలిపింది. స్వచ్ఛంద వ్యభిచారం నేరం కాదన్న సుప్రీం కోర్టు తీర్పును ఈ తీర్పు ప్రస్తావించింది. పోలీసులు వ్యభిచార గృహం పరిసరాల్లో కనిపించారన్న కారణంతో కస్టమర్లపై కేసులు నమోదు చేయకూడదని హైకోర్టు ఆదేశించింది.

ఈ అంశంపై వేర్వేరు సింగిల్ జడ్జి బెంచ్‌లు వేర్వేరు తీర్పులు ఇచ్చిన నేపథ్యంలో, విద్యార్థులు, యువకులు, వ్యాపారవేత్తలు, ప్రైవేట్ ఉద్యోగులు తమపై నమోదైన ట్రాఫికింగ్ కేసులను కొట్టివేయాలంటూ 130కి పైగా పిటిషన్లు దాఖలు చేశారు.