వర్షాకాలంలో తెలంగాణలో అధిక ఉష్ణోగ్రతలు కొనసాగుతాయని ఐఎండి హెచ్చరిక

తెలంగాణలో వర్షాకాలంలోనూ ఎండ తీవ్రత కొనసాగుతోంది. ఎల్నినో ప్రభావంతో రానున్న రోజుల్లో అధిక ఉష్ణోగ్రతలు, తక్కువ వర్షపాతం నమోదయ్యే అవకాశం ఉందని భారత వాతావరణ శాఖ (ఐఎండి) హెచ్చరించింది.

ఐఎండి అంచనా ప్రకారం పలు జిల్లాల్లో 38 నుంచి 40 డిగ్రీల సెల్సియస్ వరకు గరిష్ట ఉష్ణోగ్రతలు నమోదవుతాయి. హైదరాబాద్ పరిధిలో 36 నుంచి 38 డిగ్రీలు నమోదయ్యే అవకాశం ఉంది. జూలై 15 వరకు పొడి వాతావరణం కొనసాగుతుందని, హై హీట్ కండిషన్స్ ఉంటాయని వాతావరణ శాఖ అధికారులు సూచించారు. కొన్ని చోట్ల ఉరుములు, మెరుపులతో కూడిన చిన్నపాటి వర్షాలు పడే అవకాశం ఉన్నా గణనీయమైన వర్షాలు లేవని స్పష్టం చేశారు.

రాష్ట్రంలో వర్షపాతం లోటు తీవ్రంగా ఉంది. ఇప్పటివరకు రాష్ట్ర సగటు వర్షపాతం సాధారణం కంటే 26% తక్కువగా నమోదైంది. 33 జిల్లాల్లో 25 జిల్లాల్లో లోటు వర్షపాతం కొనసాగుతోంది. నల్గొండ, వరంగల్, హనుమకొండ, జోగులాంబ గద్వాల, నారాయణపేట తదితర జిల్లాల్లో వర్షాభావం ఎక్కువగా ఉంది. జూన్ నెలలోనూ 30% లోటు నమోదైంది.

వర్షాలు లేకపోవడంతో చెరువులు, వాగులు, రిజర్వాయర్లలో నీటి నిల్వలు తగ్గిపోతున్నాయి. రైతులు తగిన జాగ్రత్తలు తీసుకోవాలని, నీటిని అవసరమైన మేరకు మాత్రమే వాడాలని అధికారులు సూచిస్తున్నారు. వ్యవసాయ శాఖ, నీటిపారుదల శాఖల సమీక్షలు కొనసాగుతున్నాయి. రాబోయే రెండు వారాల పాటు పెద్ద వర్షాలు ఉండబోవని ఐఎండి తెలిపింది.