2028 ఎన్నికల ముందు పాలన వేగం: ఐఏఎస్ మార్పులు, కీలక ప్రాజెక్టులపై రేవంత్ సర్కార్ ఫోకస్

2028 అసెంబ్లీ ఎన్నికలకు ముందు పాలనలో వేగం పెంచేందుకు తెలంగాణ ప్రభుత్వం భారీగా ఐఏఎస్ అధికారులను బదిలీ చేసింది. కేంద్ర సర్వీసుల నుండి సంజయ్ జార్జ్ను కొత్త ప్రధాన కార్యదర్శిగా నియమించడం, సీఎంఓలో కీలక బాధ్యతల పునర్వ్యవస్థీకరణ చేపట్టింది.

రేవంత్ రెడ్డి ప్రభుత్వం మిగతా రెండేళ్లను అత్యంత కీలకంగా భావిస్తోందని, అధికారిక వర్గాలు చెబుతున్నాయి. జులైలో మరిన్ని పాలనా మార్పులు ఉండే అవకాశం ఉంది. ఎన్నికల నాటికి ప్రజలకు కనిపించే అభివృద్ధి పూర్తి చేయడమే ప్రధాన లక్ష్యమని భావిస్తున్నారు.

ఈ క్రమంలో ప్రభుత్వం మూడు ప్రధాన ప్రాజెక్టులపై ప్రత్యేక దృష్టి పెట్టింది. రక్షణ శాఖ భూములకు సంబంధించిన అనుమతులు రావడంతో మూసి రివర్ ఫ్రంట్ ప్రాజెక్టు అమలుకు వేగంగా కసరత్తు చేస్తోంది. అవసరమైతే రుణాలు తీసుకుని అయినా దీన్ని పూర్తి చేయాలని ప్రభుత్వం ఆలోచిస్తోంది. హైదరాబాద్ నగర రూపురేఖలు మార్చే ప్రాజెక్టుగా దీన్ని ప్రచారం చేయాలని చూస్తోంది.

యంగ్ ఇండియా రెసిడెన్షియల్ స్కూళ్ల ప్రాజెక్టు కూడా ప్రభుత్వ ఏజెండాలో ఉంది. ప్రతి నియోజకవర్గంలో 25 ఎకరాలలో ఆధునిక విద్యా సంస్థలు ఏర్పాటు చేసి, అన్ని వర్గాల విద్యార్థులను ఒకే క్యాంపస్లో చదివించాలని ప్రణాళికలు సిద్ధం చేశారు. ఎన్నికలకు ముందే కొన్ని పాఠశాలలను ప్రారంభించే లక్ష్యంగా పెట్టుకుంది.

ఫ్యూచర్ సిటీ పేరుతో లైఫ్ సైన్సెస్ హబ్, డేటా సిటీ, గ్రీన్ ఫార్మా క్లస్టర్, ఏఐ సిటీ, స్కిల్ యూనివర్సిటీ వంటి ప్రాజెక్టుల ద్వారా భారీ పెట్టుబడులు, వేలాది ఉద్యోగాలు తీసుకురావాలని ప్రభుత్వం ప్రణాళిక చేసింది. ముఖ్యమంత్రి స్వయంగా ఈ ప్రాజెక్టు పురోగతిని ఎప్పటికప్పుడు సమీక్షిస్తున్నారని అధికారులు తెలిపారు. హైదరాబాద్ మెట్రో రెండో దశ, తెలంగాణ పబ్లిక్ స్కూల్స్, పారడైజ్-మేడ్చెల్ ఎలివేటెడ్ కారిడార్ల వంటి ఇతర ప్రాజెక్టులను కూడా వేగవంతం చేస్తామని ప్రభుత్వం చెబుతోంది.

పాలనలో సమర్థ అధికారులకు ప్రాధాన్యం ఇవ్వడం, పెట్టుబడులు, పరిశ్రమలకు అనుకూల వాతావరణం, ఉద్యోగ అవకాశాలు, ప్రజలకు కనిపించే అభివృద్ధి పనులు పూర్తి చేయడం ద్వారా వచ్చే ఎన్నికలలో ప్రభుత్వ పనితీరుపై సానుకూల అభిప్రాయం తీసుకురావడమే ప్రస్తుత లక్ష్యమని అధికార వర్గాలు చెబుతున్నాయి.