తెలంగాణలో నేటి నుంచి భూముల రిజిస్ట్రేషన్ ధరలు పెరిగాయి

తెలంగాణ ప్రభుత్వం భూముల రిజిస్ట్రేషన్ ధరలను సవరించింది. నేటి నుంచి కొత్త ధరలు అమల్లోకి వచ్చాయి. రాష్ట్రవ్యాప్తంగా 98,000 ప్రాంతాల్లో భూముల ధరలను పెంచారు.

రెవెన్యూ, స్టాంప్స్ అండ్ రిజిస్ట్రేషన్ శాఖ మంత్రి పొంగులేటి శ్రీనివాస్ రెడ్డి ఈ వివరాలు తెలిపారు. ప్రాంతాన్ని బట్టి ప్రస్తుత ధరలపై 50 నుంచి 100 శాతం వరకు పెంచినట్లు చెప్పారు. ప్రైమ్ ఏరియాల్లో 100 శాతం పెంచామని, కొన్ని ప్రాంతాల్లో 300 శాతం మేర పెరిగిందని సమాచారం.

వ్యవసాయ భూములకు కనీస విలువను గ్రామీణ ప్రాంతాల్లో ఎకరానికి రూ.2.75 లక్షలు, మున్సిపాలిటీల్లో రూ.5 లక్షలు, హెచ్ఎండీఏ పరిధిలో రూ.10 లక్షలు, ఓఆర్ఆర్ పరిధిలో రూ.15 లక్షలుగా నిర్ణయించారు. ఓపెన్ ప్లాట్ల ధరలు సైతం భారీగా పెరిగాయి. హెచ్ఎండీఏ పరిధిలో గజం ధర కనిష్టంగా రూ.5,000గా నిర్ణయించినట్లు సమాచారం.

రిజిస్ట్రేషన్ చార్జీలు రెట్టింపు అయ్యాయి. ఇప్పటికే స్లాట్ బుక్ చేసుకుని చలాన్లు చెల్లించిన వారు కూడా అదనపు మొత్తం చెల్లించాల్సి ఉంటుందని స్టాంప్స్ అండ్ రిజిస్ట్రేషన్ శాఖ స్పష్టం చేసింది. కొత్త ధరల నమోదు కోసం గురువారం సాయంత్రం నుంచి శాఖ వెబ్‌సైట్ పనిచేయడం లేదు.

ఈ ధరల పెంపు ద్వారా ప్రభుత్వానికి ఏటా రూ.1,200 కోట్ల నుంచి రూ.1,400 కోట్ల అదనపు ఆదాయం వస్తుందని మంత్రి అంచనా వేశారు. అసైన్ భూములపై కొత్త పాలసీ తీసుకొస్తామని, త్వరలో తహసీల్దార్ల బదిలీలు చేపడతామని చెప్పారు. సబ్ రిజిస్ట్రార్ల అధికారాల్లో కోత పెడతామన్నారు.

ఈ నిర్ణయంతో భూమి కొనుగోలుదారులపై ఆర్థిక భారం పడుతుందని, రియల్ ఎస్టేట్ రంగం ప్రభావితం కావచ్చని భావిస్తున్నారు.