పూరిగుడిసెలు లేని తెలంగాణ లక్ష్యంతో ఇందిరమ్మ హౌసింగ్ రెండో విడతలో కీలక మార్పులు

పూరిగుడిసెలు లేని తెలంగాణగా మార్చే లక్ష్యంతో రాష్ట్ర ప్రభుత్వం ఇందిరమ్మ ఇల్లు పథకం రెండో విడతలో పలు కీలక మార్పులు చేసింది. గుడిసె నివాసులకు మొదటి ప్రాధాన్యత ఇస్తామని, మలేషియా టెక్నాలజీతో నెల రోజుల్లోనే ఇళ్లు నిర్మిస్తామని హౌసింగ్ శాఖ ప్రత్యేక కార్యదర్శి వి.పి. గౌతమ్ తెలిపారు.

మొదటి విడతలో 4 లక్షల ఇళ్లు మంజూరు కాగా, 3 లక్షలకుపైగా గ్రౌండింగ్ జరిగింది. ఇప్పటికే లక్ష ఇళ్లు పూర్తయ్యాయి. సెప్టెంబర్ నాటికి మరో లక్ష ఇళ్లు, డిసెంబర్ నాటికి మొత్తం మొదటి దశ ఇళ్లను పూర్తి చేస్తామని గౌతమ్ చెప్పారు. చివరి బిల్లు కొన్ని సాంకేతిక సమస్యల కారణంగా ఆలస్యమైందని, నెల రోజుల్లోగా లబ్ధిదారుల ఖాతాల్లో జమ చేస్తామని హామీ ఇచ్చారు.

రెండో విడతకు సంబంధించి రాష్ట్రవ్యాప్తంగా 40,000 గుడిసెలను గుర్తించామని, వాటిని నిర్మూలించేందుకు ఈ దశలోనే చర్యలు తీసుకుంటామన్నారు. నియోజకవర్గానికి 2,000 ఇళ్ల చొప్పున మంజూరు చేసిన 2.5 లక్షల ఇళ్లలో తొలి ప్రాధాన్యత గుడిసె నివాసులకే కేటాయించాలని కలెక్టర్లకు ఆదేశాలు ఇచ్చామని వివరించారు.

గుడిసెలో నివసించే వారు సొంతంగా నిర్మించుకోలేకపోతే, స్థానిక ఎమ్మెల్యే, ఇందిరమ్మ కమిటీల సహకారంతో ప్రభుత్వమే నిర్మించి ఇచ్చేలా ప్రణాళిక రూపొందించామని చెప్పారు. నిర్మాణ ఖర్చు నియంత్రణ కోసం మలేషియన్ మోనోలిథిక్ టెక్నాలజీని అమలు చేస్తున్నారు. ఈ పద్ధతిలో ఒక నెలలోనే ఇల్లు పూర్తవుతుందని, 5 లక్షల రూపాయలు మించి ఖర్చు ఉండదని గౌతమ్ స్పష్టం చేశారు.

ఈ విడతలో మరో కొత్త అంశంగా రూఫ్ రీప్లేస్మెంట్ స్కీమ్ తీసుకొచ్చారు. గోడలు బలంగా ఉన్నా పైకప్పు సరిగా లేని కుటుంబాలు ఇంటిని కూల్చివేయాల్సిన అవసరం లేకుండా స్లాబ్ వేయించుకోవచ్చు. నియోజకవర్గంలో 500 మందికి ఈ అవకాశం ఉంటుంది. 2 లక్షల రూపాయలు ప్రభుత్వం అందిస్తుంది. గతంలో ఇందిరమ్మ స్కీమ్ మంజూరై, నిలిచిపోవడంతో ఇల్లు పూర్తి చేసుకోలేని వారు కూడా ఈ స్కీమ్ కిందకు వస్తారని తెలిపారు.

కేంద్ర ప్రభుత్వం నుంచి పీఎం ఆవాస్ యోజన గ్రామీణ్ నిధులు ఇంకా రాలేదని, అయితే రాష్ట్ర ప్రభుత్వం సొంతంగా 5 లక్షలు లబ్ధిదారులకు చెల్లిస్తుందని గౌతమ్ హామీ ఇచ్చారు. ఇప్పటికే 12 లక్షల కుటుంబాల డేటాను కేంద్రానికి అప్లోడ్ చేశామని, కేంద్రం నుంచి నిధులు వస్తే టాప్-అప్ చేస్తామన్నారు.

స్లాబ్ ఏరియా విస్తీర్ణంపై ప్రభుత్వం ఇటీవల విధించిన పరిమితుల గురించి కూడా వివరించారు. మేస్త్రీలు అదనపు స్లాబ్ వేయించి లబ్ధిదారులపై ఆర్థిక భారం పెంచకుండా, ప్లింత్ ఏరియాలో 20 శాతం మించి పెంచకూడదని నిబంధన పెట్టామన్నారు. ఇది లబ్ధిదారుల ప్రయోజనాలను కాపాడేందుకే అని చెప్పారు.

ఈ రెండో దశ లబ్ధిదారుల ఎంపిక ప్రక్రియ కొనసాగుతోంది. ఆగస్టు నాటికి ఇళ్లు గ్రౌండింగ్ అవుతాయని, ప్రస్తుత ఆర్థిక సంవత్సరంలో 50 శాతం పూర్తి చేసి, మిగిలిన వాటిని వచ్చే ఆరు నెలల్లో పూర్తి చేస్తామని గౌతమ్ వెల్లడించారు.