తెలంగాణ ఇంటర్ విద్యలో కీలక మార్పులు: ఫస్ట్ ఇయర్ నుంచే ప్రాక్టికల్స్

తెలంగాణ ఇంటర్మీడియట్ బోర్డు విద్యా విధానంలో కీలక మార్పులు తీసుకొచ్చింది. ఇప్పటివరకు కేవలం సెకండ్ ఇయర్‌లో మాత్రమే నిర్వహించిన ప్రాక్టికల్స్‌ను ఇకపై ఫస్ట్ ఇయర్ నుంచే నిర్వహించనున్నారు. ఫిజిక్స్, కెమిస్ట్రీ, బాటనీ, జువాలజీ సబ్జెక్టులకు ఫస్ట్ ఇయర్‌లో 15 మార్కులు, సెకండ్ ఇయర్‌లో 15 మార్కులు ప్రాక్టికల్స్‌కు కేటాయిస్తారు.

మాథ్స్ విభాగంలో యాక్టివిటీ బేస్డ్ లెర్నింగ్‌ను ఇంటర్ బోర్డు ప్రవేశపెట్టింది. గతంలో 75 మార్కులకు నిర్వహించిన ఫైనల్ పరీక్ష ఇకపై 60 మార్కులకు మాత్రమే ఉంటుంది. ప్రతి సంవత్సరానికి 15 మార్కులు ఇంటర్నల్ అసెస్మెంట్‌కు కేటాయించారు.

హ్యుమానిటీస్ మరియు భాషా విభాగాల్లో కూడా మార్పులు చేశారు. ఈ విభాగాల్లో 100 మార్కులకు నిర్వహించిన ఫైనల్ పరీక్ష ఇకపై 80 మార్కులకు నిర్వహిస్తారు. మిగిలిన 20 మార్కులు యాక్టివిటీ బేస్డ్ లెర్నింగ్ మరియు ఇంటర్నల్ అసెస్మెంట్‌కు కేటాయిస్తారు.

ఈ మార్పులపై ఇంటర్మీడియట్ అధికారులు త్వరలో పూర్తి వివరాలు అధికారికంగా వెల్లడించనున్నారని ఇంటర్ బోర్డు వర్గాలు తెలిపాయి.