తెలంగాణలో నేటి నుంచి పెరిగిన భూముల విలువలు; ప్రభుత్వానికి ఏటా ₹1200 కోట్ల ఆదాయం

తెలంగాణలో నేటి నుంచి భూములు, ప్లాట్లు, అపార్ట్మెంట్లకు కొత్త మార్కెట్ విలువలు అమల్లోకి వచ్చాయి. రిజిస్ట్రేషన్ల శాఖ పోర్టల్లో పెంచిన విలువల వివరాలు అందుబాటులో ఉంచారు. ఈ నిర్ణయం ద్వారా ప్రభుత్వానికి ఏటా ₹1,200 కోట్ల వరకు అదనపు రాబడి లభిస్తుందని అధికారులు లెక్కలు వేశారు.

హైదరాబాద్ సహా వివిధ ప్రాంతాల్లో మార్కెట్ విలువల సవరణ చేపట్టారు. ఔటర్ రింగ్ రోడ్ పరిధిలోని అనేక ప్రాంతాల్లో భూముల విలువలు 25% నుంచి 75% వరకు, కొన్ని చోట్ల 100% పెరిగాయి. ఓల్డ్ సిటీలో 10% నుంచి 20% మాత్రమే పెంచారు. అత్యధిక విలువలు ఉన్న జూబ్లీహిల్స్లో చదరపు గజం విలువ ఇప్పటికే ₹80,000 ఉండగా, దాన్ని ₹90,000కు పెంచారు. తెల్లాపూర్, శంషాబాద్ ప్రాంతాల్లో వ్యవసాయ భూముల విలువ తక్కువగా ఉండడంతో దాన్ని 100% పెంచారు.

భూముల విలువల సవరణ కోసం అధికారుల కమిటీ క్షేత్రస్థాయిలో లోతైన అధ్యయనం నిర్వహించింది. మౌలిక సదుపాయాలు, గ్రోత్ కారిడార్లు, ప్రస్తుత మార్కెట్ రేట్లను పరిగణనలోకి తీసుకుని 92,000 ప్రాంతాల్లో విలువ మార్పును చేపట్టారు. దీంతో రిజిస్ట్రేషన్లు, స్టాంప్ డ్యూటీ ద్వారా ప్రభుత్వానికి ఆదాయం పెరగడంతోపాటు భూయజమానులకు కూడా లాభం చేకూరనుందని రెవెన్యూ వర్గాలు తెలిపాయి.