తెలంగాణలో భూముల విలువ పెంపు నేటి నుంచి అమలు

తెలంగాణ రాష్ట్ర ప్రభుత్వం సవరించిన భూముల మార్కెట్ విలువలు నేటి (శుక్రవారం) నుంచి అమల్లోకి వచ్చాయి. రిజిస్ట్రేషన్ల సమయంలో లెక్కించే ఈ విలువలను వ్యవసాయ భూములకు 50 నుంచి 100 శాతం వరకు, ప్లాట్ల విషయంలో 10 నుంచి 20 శాతం వరకు పెంచినట్లు అధికారిక వర్గాలు తెలిపాయి.

రాష్ట్రవ్యాప్తంగా 92.92 లక్షల ప్రాంతాల్లో భూముల విలువను సవరించారు. వ్యవసాయ భూముల కనీస విలువ ఎకరాకు రూ.2.75 లక్షలు కాగా, గరిష్టంగా ఎకరా రూ.35 కోట్ల వరకు ఉంది. గ్రామీణ ప్రాంతాల్లో 50 నుంచి 75%, పట్టణ ప్రాంతాల్లో 75 నుంచి 100% వరకు పెరుగుదల నమోదైంది.

హనుమకొండ, కాజీపేట, ఖమ్మం, నిజామాబాద్, నల్లగొండ జిల్లాల్లో భూమి విలువ 75% వరకు పెరిగింది. ఉదాహరణకు, హనుమకొండలో చదరపు గజం ధర రూ.5,800 నుంచి రూ.8,700కు, కాజీపేటలో రూ.9,500 నుంచి రూ.14,250కు పెరిగింది.

హైదరాబాద్ ఔటర్ రింగ్ రోడ్డు (ORR) పరిధి, రంగారెడ్డి, మేడ్చల్ జిల్లాల్లోని పలు ప్రాంతాల్లో భూముల విలువ 100% వరకు పెరిగింది. కోకాపేట్లో చదరపు గజం విలువ రూ.23,800 నుంచి రూ.47,600కు, బంజారా హిల్స్‌లో రూ.1,16,000కు పెంచారు. అత్తాపూర్లో రూ.20,300 నుంచి రూ.30,500కు, కొంపల్లిలో రూ.11,600 నుంచి రూ.17,400కు పెరిగింది.

అపార్ట్‌మెంట్ల విషయంలో, కొంపల్లిలో చదరపు అడుగు విలువ రూ.2,200 నుంచి రూ.2,700కు, బాలానగర్, పఠాన్‌చెరు ప్రాంతాల్లో రూ.2,500 నుంచి రూ.3,000కు పెరిగింది. ఎకరం విలువలు కూడా భారీగా పెరిగాయి; హఫీస్‌పేటలో రూ.11 కోట్ల నుంచి రూ.18 కోట్లకు, నాగోల్‌లో రూ.11 కోట్ల నుంచి రూ.20 కోట్లకు చేరుకున్నాయి.

జిల్లా స్థాయిలో, రంగారెడ్డిలో ఎకరం సగటు విలువ రూ.1.01 కోట్ల నుంచి రూ.1.16 కోట్లకు, నల్లగొండలో రూ.2.25 లక్షల నుంచి రూ.3.93 లక్షలకు పెరిగింది. మిర్యాలగూడలో రూ.4.5 లక్షల నుంచి రూ.6.75 లక్షలు, కరీంనగర్‌లో రూ.5.25 లక్షల నుంచి రూ.6.03 లక్షలకు చేరింది.

ఈ విలువల పెంపుతో ఆస్తి రిజిస్ట్రేషన్లపై చెల్లించాల్సిన స్టాంప్ డ్యూటీ, రిజిస్ట్రేషన్ ఛార్జీలు పెరగనున్నాయి.