తెలంగాణలో మూడు రోజుల పల్స్ పోలియో కార్యక్రమం ప్రారంభం

తెలంగాణ రాష్ట్రవ్యాప్తంగా పల్స్ పోలియో కార్యక్రమం ప్రారంభమైంది. ఉదయం 7 గంటల నుంచి సాయంత్రం 6 గంటల వరకు ఐదేళ్ల లోపు పిల్లలకు పోలియో డ్రాప్స్ ఉచితంగా అందిస్తున్నారు. ముందుగా నిర్దేశించిన బూత్ సెంటర్లలో PHC సిబ్బంది చిన్నారులకు పోలియో చుక్కలు వేస్తున్నారు.

పల్స్ పోలియో కార్యక్రమం కోసం రాష్ట్రవ్యాప్తంగా 22,979 బూత్లు ఏర్పాటు చేశారు. బస్ స్టాండ్లు, రైల్వే స్టేషన్లతో సహా 903 ట్రాన్సిట్ పాయింట్లలో పోలియో చుక్కలు వేసే కార్యక్రమం కొనసాగుతోంది. మారుమూల ప్రాంతాలకు చేరేందుకు 903 మొబైల్ టీమ్లు క్షేత్ర స్థాయిలో పనిచేస్తున్నాయి. ANM లు, ఆశా కార్యకర్తలు, అంగన్వాడీ టీచర్లు ఇతర శాఖలతో సమన్వయంతో సేవలు అందిస్తున్నారు.

హైదరాబాద్, రంగారెడ్డి, మేడ్చల్, సంగారెడ్డి జిల్లాల్లో జనసాంద్రత ఎక్కువగా ఉన్నందున జూలై 1 వరకు పల్స్ పోలియో డ్రైవ్ కొనసాగించనున్నారు. రాష్ట్రవ్యాప్తంగా మొత్తం 40,97,749 మంది ఐదేళ్ల లోపు చిన్నారులకు టీకా వేయాలని ప్రభుత్వం లక్ష్యంగా పెట్టుకుంది.

గతంలో పోలియో చుక్కలు వేయించినప్పటికీ, ఈ కార్యక్రమంలో మరోసారి వేయించడం సురక్షితమని వైద్య నిపుణులు స్పష్టం చేశారు. భవిష్యత్తు తరాలకు ఆరోగ్యకరమైన జీవితం అందించేందుకు తల్లిదండ్రులు తప్పనిసరిగా తమ పిల్లలకు పోలియో చుక్కలు వేయించాలని ప్రభుత్వం విజ్ఞప్తి చేసింది.