తెలంగాణలో కనీస వేతనాలు పెంపు — జూన్ 1 నుంచి అమలు

తెలంగాణ ప్రభుత్వం కార్మికుల కనీస వేతనాలను పెంచింది. ఈ నిర్ణయం జూన్ 1 నుంచి అమల్లోకి వస్తుందని CM రేవంత్ రెడ్డి ప్రకటించారు. దీని వల్ల రాష్ట్రంలో 1.11 కోట్ల మంది కార్మికులకు ప్రయోజనం చేకూరుతుందని ప్రభుత్వం తెలిపింది.

నాలుగు వర్గాల కార్మికులకు వేతనాలు పెంచారు. అన్‌స్కిల్డ్ కార్మికుల వేతనం ₹12,750 నుంచి ₹16,000కు పెరిగింది. సెమీ స్కిల్డ్ కార్మికుల వేతనం ₹13,592 నుంచి ₹17,000కు పెరిగింది. స్కిల్డ్ కార్మికుల వేతనం ₹13,720 నుంచి ₹18,500కు, హై స్కిల్డ్ కార్మికుల వేతనం ₹14,607 నుంచి ₹20,000కు పెంచారు.

కార్మికులను మూడు జోన్లుగా విభజించారు. కార్పొరేషన్ పరిధిలో పని చేసే వారిని గ్రేడ్ 1గా, మున్సిపాలిటీ పరిధిలో పని చేసే వారిని గ్రేడ్ 2గా, గ్రామీణ ప్రాంతాల్లో పని చేసే వారిని గ్రేడ్ 3గా వర్గీకరించారు.

పెరుగుతున్న జీవన వ్యయం, నిత్యవసర వస్తువుల ధరలు, ఇంటి అద్దెలు పరిగణలోకి తీసుకుని ఈ నిర్ణయం తీసుకున్నట్లు రేవంత్ రెడ్డి తెలిపారు. కనీస వేతనాల అమలుపై రాష్ట్ర కార్మిక శాఖ పర్యవేక్షణ ఉంటుందని కూడా ఆయన పేర్కొన్నారు.

ఈ నిర్ణయంపై BRS, ఇతర ప్రతిపక్ష పార్టీల స్పందన తెలియాల్సి ఉంది.