పంటపొలాల్లో కోతుల ముప్పుపై హైదరాబాద్‌లో రౌండ్ టేబుల్ సమావేశం

పంటపొలాల్లో కోతుల ముప్పుపై హైదరాబాద్ సోమాజిగూడ ప్రెస్ క్లబ్‌లో రౌండ్ టేబుల్ సమావేశం జరిగింది. తెలంగాణ సమాఖ్య ఆధ్వర్యంలో ఈ సమావేశం నిర్వహించారు. అఖిలపక్ష నేతలు, రైతు సంఘాల ప్రతినిధులు పాల్గొన్నారు.

రాష్ట్రంలోని 11 జిల్లాల్లో కోతుల సమస్య తీవ్రంగా ఉందని తెలంగాణ సమాఖ్య నివేదిక పేర్కొంది. జనగామ, ములుగు జిల్లాలు అత్యంత ప్రభావిత ప్రాంతాలుగా గుర్తించారు. వేరుశనగ, జొన్న, పెసర్లు, పత్తి, మామిడి, అరటి తోటలకు కోతుల వల్ల భారీ నష్టం జరుగుతోందని నివేదిక తెలిపింది. 30% వరకు పంట నష్టం జరుగుతుందని, రైతులు అప్పుల పాలవుతున్నారని పేర్కొన్నారు.

మహిళలు, పిల్లలు, వృద్ధులపై కోతుల దాడులు పెరుగుతున్నాయని నేతలు ఆందోళన వ్యక్తం చేశారు. కోతులు వ్యాధులు వ్యాప్తి చేస్తాయని, నీటి వనరుల దగ్గర పశువులకు, మనుషులకు వైరస్ అంటే ప్రమాదం ఉందని హెచ్చరించారు.

సోలార్ ఫెన్సింగ్, శబ్ద ఫిరంగులు, లేజర్ పరికరాలు తాత్కాలిక ఉపశమనం మాత్రమే ఇస్తున్నాయని, శాశ్వత పరిష్కారం అవసరమని నేతలు సూచించారు. హిమాచల్ ప్రదేశ్ వ్యూహం మాదిరిగా ఏటా 25,000 కోతులకు కుటుంబ నియంత్రణ ఆపరేషన్లు చేయాలని కోరారు. అడవుల్లో పండ్ల చెట్లు నాటి కోతులకు ఆహారం, ఆవాసాలు కల్పించాలని సూచించారు. కోతుల జనాభాపై drone, GIS మ్యాపింగ్ ద్వారా సర్వే నిర్వహించాలని పేర్కొన్నారు.

కోతుల నియంత్రణ కోసం బడ్జెట్‌లో ప్రత్యేక నిధులు కేటాయించాలని, పర్యవేక్షణ కమిటీ ఏర్పాటు చేయాలని ప్రభుత్వానికి విజ్ఞప్తి చేశారు. నష్టపోయిన రైతులకు పంట పరిహారం, పంట బీమా కల్పించాలని డిమాండ్ చేశారు. రైతు కమిషన్ చైర్మన్ కోదండరెడ్డి ఈ సమస్యను ప్రభుత్వం దృష్టికి తీసుకెళ్తానని హామి ఇచ్చారు. రైతు కమిషన్ కార్యాలయంలో మరోసారి సమావేశమై ప్రభుత్వానికి సమగ్ర నివేదిక అందిస్తామని కోదండరెడ్డి తెలిపారు.