తెలంగాణలో గ్రీన్ ఎనర్జీ కోసం ఓపెన్ యాక్సెస్ పాలసీ ప్రకటించిన సర్కారు

తెలంగాణ ప్రభుత్వం గ్రీన్ ఎనర్జీ కోసం ఓపెన్ యాక్సెస్ పాలసీని ప్రారంభించింది.

హైదరాబాద్‌లో జరిగిన గ్రీన్ గ్రోత్ ఎకనామిక్ సమ్మిట్‌లో డిప్యూటీ సీఎం భట్టి విక్రమార్క, ఐటీ మంత్రి డి. శ్రీధర్ బాబు ఈ విషయాన్ని వెల్లడించారు.

డిప్యూటీ సీఎం మాట్లాడుతూ, ఎనర్జీ మంత్రిగా విద్యుత్ సరఫరా మార్గాలపై, ప్లానింగ్ మంత్రిగా యువత భవిష్యత్తుపై దృష్టి పెట్టాలన్నారు. సైన్స్, టెక్నాలజీ ప్రజలకు ఉపయోగపడేలా ప్రభుత్వం కట్టుబడి ఉందని వివరించారు.

మంత్రి శ్రీధర్ బాబు మాట్లాడుతూ, "మీ వ్యాపారాన్ని తెలంగాణకు తీసుకురండి. గ్రీన్ రెన్యూవబుల్ ఎనర్జీ అందుబాటులో ఉంటుంది" అని హామీ ఇచ్చారు. డేటా సెంటర్లకు అవసరమైన విద్యుత్ కోసం ఈ కొత్త విధానం తీసుకువచ్చినట్లు తెలిపారు.

నీటి సరఫరా రోజుకు 550 మిలియన్ గ్యాలన్లు అని, ఇది బెంగళూరు, చెన్నై కంటే ఎక్కువ అని మంత్రి పేర్కొన్నారు. ప్రస్తుతం 15 బిలియన్ డాలర్ల (సుమారు రూ.1.25 లక్షల కోట్లు) మౌలిక సదుపాయాల ప్రాజెక్టులు కొనసాగుతున్నాయి.

ఈ పెట్టుబడులు 50 ఏళ్ల భవిష్యత్తును దృష్టిలో పెట్టుకుని చేస్తున్నామని, ఫలితాలు 2-3 ఏళ్లలో కాకుండా దీర్ఘకాలంలో కనిపిస్తాయని మంత్రి వివరించారు.