తెలంగాణలో 4 జిల్లాలకు ఆరెంజ్ అలర్ట్: ఇవాళ, రేపు భారీ వర్షాలు

తెలంగాణలోని నాలుగు జిల్లాలకు వాతావరణ శాఖ ఆరెంజ్ అలర్ట్ జారీ చేసింది. జయశంకర్ భూపాలపల్లి, ములుగు, భద్రాద్రి కొత్తగూడం, ఖమ్మం జిల్లాల్లో ఇవాళ, రేపు భారీ నుంచి అతిభారీ వర్షాలు కురిసే అవకాశం ఉంది. ఉరుములు, మెరుపులు, ఈదురుగాలులతో కూడిన వర్షాలు కురుస్తాయని, గాలి వేగం గంటకు 50-60 కి.మీ. ఉండొచ్చని శాఖ హెచ్చరించింది. మిగతా జిల్లాల్లో తేలికపాటి నుంచి మోస్తరు వర్షాలు పడతాయని తెలిపింది.

బంగాళాఖాతంలో ఏర్పడిన బలమైన అల్పపీడనం స్థిరంగా కొనసాగుతోంది. దీనికి అనుబంధంగా ఉపరితల ఆవర్తనం 9.4 కి.మీ. ఎత్తు వరకు విస్తరించింది. ఈ అల్పపీడనం రాబోయే మూడు రోజుల్లో పశ్చిమ వాయువ్య దిశగా కదిలి, ఉత్తర ఒడిస్సా, ఉత్తర ఛత్తీస్‌గడ్ మీదుగా ప్రయాణించే అవకాశం ఉంది. దీని ప్రభావంతో తెలంగాణలో రాగల 3-4 రోజులు పలు ప్రాంతాల్లో విస్తారంగా వర్షాలు కురుస్తాయని వాతావరణ శాఖ అంచనా వేసింది.

గత 24 గంటల్లో కామారెడ్డి జిల్లా బిట్నూర్లో 6 సెం.మీ., సిద్దిపేట జిల్లా కొండపాక, మంచిర్యాల, ములుగు జిల్లా గోవిందరావుపేటలో 5 సెం.మీ. చొప్పున వర్షపాతం నమోదైంది. భూపాలపల్లి, మహబూబాబాద్, కరీంనగర్, రాజన్న సిరిసిల్ల జిల్లాల్లోనూ 4 సెం.మీ. నుంచి 5 సెం.మీ. వర్షం కురిసింది. హైదరాబాద్‌లో నిన్న సాయంత్రం నుంచి 24 గంటల పాటు ముసురు, చిరుజల్లులు కొనసాగాయి.

భారీ వర్షాల నేపథ్యంలో అధికారులు లోతట్టు ప్రాంతాల ప్రజలను అప్రమత్తం చేశారు. రెవెన్యూ అధికారులు గ్రామాల్లో పర్యటిస్తూ, ప్రమాద సమయాల్లో ఎవరిని సంప్రదించాలో తెలియజేస్తున్నారు. పునరావాస కేంద్రాలు సిద్ధం చేస్తున్నారు. ఉరుములు, మెరుపుల సమయంలో చెట్ల కింద ఉండొద్దని ప్రజలకు సూచించారు. ఏజెన్సీ ప్రాంతాల్లో వాగులు, వంకలు పొంగే అవకాశం ఉన్నందున రాకపోకలపై నిఘా ఉంచుతున్నారు.

వర్షాలు చెరువులు, వాగులు, ప్రాజెక్టుల నీటి నిల్వను పెంచుతాయని, రైతులకు పంట సాగుకు ఉపయోగపడతాయని వ్యవసాయ వర్గాలు భావిస్తున్నాయి. ప్రస్తుతం లోటు వర్షపాతం నేపథ్యంలో రైతులు ఈ భారీ వర్షాల కోసం ఆశగా ఎదురుచూస్తున్నారు.