తెలంగాణలో ధాన్యం కొనుగోలు జాప్యం: రైతులు వివిధ జిల్లాల్లో నిరసన

తెలంగాణలో ధాన్యం కొనుగోలు జాప్యంతో రైతులు తీవ్రంగా నష్టపోతున్నారు. నల్గొండ జిల్లాలో 45 రోజులుగా కొనుగోలు కేంద్రాల్లో ధాన్యం పేరుకుపోయింది. ఇప్పటివరకు 50% ధాన్యం మాత్రమే కొనుగోలు చేసినట్టు తెలుస్తోంది.

జనగామ జిల్లా రఘునాథపల్లి మండలం మండలగూడం గ్రామంలో రైతులు ప్రభుత్వ దిష్టిబొమ్మను దహనం చేశారు. సిద్దిపేట జిల్లా పుల్లూరు గ్రామంలో రైతులు రాస్తారోకో చేపట్టారు. ఆదిలాబాద్ జిల్లాలోనూ రైతులు రహదారిపై ధర్నాకు దిగారు.

నాగర్కర్నూల్ జిల్లా కోడేరు మండలంలో గాలివాన కారణంగా కొనుగోలు కేంద్రంలో ధాన్యం తడిసిపోయింది. అకాల వర్షాలకు ధాన్యం నష్టపోతున్నా కొనుగోలు జరగడం లేదని రైతులు వాపోతున్నారు.

మెదక్ జిల్లా చేగుంట మండలం మక్కరాజుపేట గ్రామానికి చెందిన రైతు రాట్ల భిక్షపతి ధాన్యం కొనుగోలు కాకపోవడంతో పురుగుల మందు తాగారు. ఆయనను తూప్రాన్ ప్రభుత్వ ఆసుపత్రికి తరలించి చికిత్స అందిస్తున్నారు.

ధాన్యం కొనుగోలు టార్గెట్‌ను 90 లక్షల మెట్రిక్ టన్నుల నుంచి 75 లక్షల మెట్రిక్ టన్నులకు తగ్గించారని BRS నేత హరీష్ రావు ఆరోపించారు. 2020-21 యాసంగి సీజన్‌లో BRS ప్రభుత్వం 92.39 లక్షల మెట్రిక్ టన్నుల ధాన్యం కొనుగోలు చేసిందని ఆయన గుర్తు చేశారు. ఈ విషయంపై రాష్ట్ర ప్రభుత్వ స్పందన లభ్యం కాలేదు.