తెలంగాణ పంచాయతీ సిబ్బందికి నెల మొదటి రోజే జీతాలు: CM రేవంత్ ఆదేశాలు

తెలంగాణలో సుమారు 50 వేల మంది గ్రామ పంచాయతీ సిబ్బందికి ఇకపై నెల మొదటి రోజే జీతాలు అందేలా చేయాలని CM రేవంత్ రెడ్డి అధికారులను ఆదేశించారు. పంచాయతీరాజ్ గ్రామీణ అభివృద్ధి శాఖపై ఉన్నతాధికారులతో సమీక్ష నిర్వహించిన తర్వాత ఈ నిర్ణయం తీసుకున్నారు.

జీతాల చెల్లింపులో జాప్యం జరగకుండా ప్రభుత్వం నుంచి ప్రతి నెల ₹50 కోట్లు ప్రత్యేకంగా విడుదల చేస్తామని CM హామి ఇచ్చారు. పంచాయతీ సిబ్బందికే కాకుండా అన్ని శాఖల్లో అవుట్సోర్సింగ్, కాంట్రాక్ట్ ఉద్యోగులందరికీ నెల మొదటి రోజే జీతాలు అందాలని ఆయన స్పష్టం చేశారు. ఒక్కరోజు ఆలస్యమైనా సహించేది లేదని హెచ్చరించారు.

పంచాయతీల ఆర్థిక స్వయం ప్రతిపత్తికి సంబంధించి కూడా కీలక నిర్ణయం తీసుకున్నారు. గ్రామ పంచాయతీల సొంత ఆదాయాన్ని ప్రభుత్వ ట్రెజరీ ఖాతాలో జమ చేయాలనే నిబంధనను రద్దు చేయాలని ఆదేశించారు. తెలంగాణ పంచాయతీరాజ్ చట్టం 2018 లోని సెక్షన్ 73 కింద సవరణలు చేసి, పంచాయతీల ఆదాయాన్ని నేరుగా వాటి బ్యాంకు ఖాతాల్లో జమ చేయాలని సూచించారు.

ప్రస్తుతం పోస్టల్ శాఖ ద్వారా అందిస్తున్న పెన్షన్లను ఇకపై నేరుగా లబ్ధిదారుల బ్యాంకు ఖాతాల్లో జమ చేయాలని కూడా CM ఆదేశించారు.