ఫోన్ టాపింగ్ కేసు: SIT విచారణలో 600 మందికి పైగా ఫోన్లు నిఘాలో ఉన్నట్లు వెల్లడి

తెలంగాణ ఫోన్ టాపింగ్ కేసు దర్యాప్తులో భాగంగా SIT అధికారులు దేవరకద్ర కాంగ్రెస్ MLA మధుసూదన్ రెడ్డి స్టేట్మెంట్ నమోదు చేసుకున్నారు. మొత్తం 66 hard disks ఉండగా 65 నాశనం చేయబడ్డాయని, ఒక్క hard disk మాత్రమే SIT కి దొరికిందని MLA తెలిపారు.

ఆ ఒక్క hard disk లోనే 600 మందికి పైగా ఫోన్లు నిఘాలో ఉన్న ఆధారాలు బయటపడ్డాయని SIT అధికారులు తన స్టేట్మెంట్ నమోదుకు ముందే తనకు చెప్పారని మధుసూదన్ రెడ్డి పేర్కొన్నారు. తన ఫోన్ జూలై 13, 2022 నుండి 2023 అసెంబ్లీ ఎన్నికల వరకు నిఘాలో ఉందని SIT ఆధారాలతో చూపించిందని ఆయన తెలిపారు. ఆ సమయంలో తాను మహబూబ్‌నగర్ జిల్లా DCC అధ్యక్షుడిగా ఉన్నారు.

రేవంత్ రెడ్డి సన్నిహితులు, ఈటెల రాజేందర్ అనుయాయులు, హరీష్ రావు పరిచయస్తులు అలా వేర్వేరు గ్రూపులుగా విభజించి ఆయా గ్రూపుల్లోని వ్యక్తుల ఫోన్లు నిఘాలో పెట్టినట్లు SIT దర్యాప్తులో తేలుతోందని మధుసూదన్ రెడ్డి పేర్కొన్నారు. రాజకీయ నేతలే కాకుండా న్యాయమూర్తులు, వ్యాపారవేత్తలు, సినీ పరిశ్రమకు చెందిన వారి ఫోన్లు కూడా టాప్ అయినట్లు SIT దర్యాప్తులో వెలుగులోకి వస్తోందని ఆయన చెప్పారు.

మాజీ SIB చీఫ్ ప్రభాకర్ రావు ఆధ్వర్యంలో ఇదంతా జరిగిందని SIT అధికారులు చెప్తున్నారని మధుసూదన్ రెడ్డి పేర్కొన్నారు. మిగతా 65 hard disks కూడా దొరికితే ఎంత మంది ఫోన్లు నిఘాలో ఉన్నాయో తెలుస్తుందని ఆయన అన్నారు. SIT విచారణలో మరింత సమాచారం అవసరమైతే ఇవ్వడానికి సిద్ధంగా ఉన్నానని మధుసూదన్ రెడ్డి తెలిపారు.

ఈ ఆరోపణలపై BRS స్పందన తెలియాల్సి ఉంది. SIT నివేదిక కోర్టుకు సమర్పించిన తర్వాత తదుపరి చర్యలు స్పష్టమవుతాయి.