రేపటి నుంచి తెలంగాణలో సవరించిన ప్రాపర్టీ రిజిస్ట్రేషన్ ధరలు అమల్లోకి

తెలంగాణలో రేపటి నుంచి (జూన్ 5) సవరించిన భూముల రిజిస్ట్రేషన్ విలువలు అమల్లోకి రానున్నాయి. మార్కెట్ ధరలకు అనుగుణంగా ప్రభుత్వం ఈ కొత్త విలువలను ఖరారు చేసింది.

వ్యవసాయ భూముల కనీస ధరను ఎకరాకు రూ. 2.75 లక్షలుగా నిర్ణయించారు. ప్రభుత్వం 'క్యూర్ ఏరియా'గా గుర్తించిన ప్రాంతాల్లో వ్యవసాయ భూమి కనీస ధర ఎకరాకు రూ. 15 లక్షలుగా ఉంది. రాష్ట్రంలోనే అత్యధిక మార్కెట్ విలువ రంగారెడ్డి జిల్లా శేరిలింగంపల్లి మండలం ఖాజాగూడలో ఉంది. ఇక్కడ గతంలో ఎకరాకు రూ. 24 కోట్లు ఉండగా, ఇప్పుడు దాన్ని రూ. 30 కోట్లకు పెంచారు.

ఓపెన్ ప్లాట్ల కనీస ధరలను చదరపు గజం లెక్కన ప్రాంతాల వారీగా వర్గీకరించారు. గ్రామీణ ప్రాంతాల్లో చదరపు గజం రూ. 600, మున్సిపాలిటీలో రూ. 1,000, మున్సిపల్ కార్పొరేషన్ లో రూ. 1,500, హెచ్ఎండీఏ పరిధిలో రూ. 2,000, క్యూర్ ఏరియాలో రూ. 3,000 గా నిర్ణయించారు. గరిష్టంగా గచ్చిబోలి రెసిడెన్షియల్ ఏరియాలో చదరపు గజం ధర రూ. 78,000కు చేరింది. గచ్చిబోలి కమర్షియల్ ఏరియాలో గరిష్ట ధర చదరపు గజానికి రూ. 1.15 లక్షలుగా నిర్ణయించారు. అపార్ట్మెంట్ల విషయంలో క్యూర్ ఏరియాలో చదరపు అడుగు కనీస ధర రూ. 2,000 గా ఖరారు చేయగా, గరిష్ట ధర రూ. 6,600 యథాతథంగా కొనసాగిస్తున్నారు.

మొత్తంగా వ్యవసాయ భూముల ధరలు 50% నుంచి 100% వరకు, ఓపెన్ ప్లాట్ల ధరలు 50% నుంచి 100% వరకు, అపార్ట్మెంట్ల ధరలు గరిష్టంగా 20% పెరిగాయి. ఆర్థిక నిపుణుడు అరవింద్ సుబ్రహ్మణ్యం నివేదిక, ఉన్నతాధికారుల సూచనలు పరిగణనలోకి తీసుకున్న తర్వాత ఈ సవరణ చేపట్టినట్టు రెవెన్యూ శాఖ మంత్రి పొంగులేటి శ్రీనివాస్ రెడ్డి తెలిపారు. గత 5 ఏండ్లలో నిర్మాణ సామగ్రి ధరలు, కార్మికుల వేతనాలు పెరగడంతో ఆర్సీసీ, నాన్-ఆర్సీసీ నిర్మాణ రేట్లను కూడా సవరించినట్టు వెల్లడించారు.