రాబోయే 5 రోజులు తెలంగాణలో భారీ వర్షాలు: వ్యవసాయ సూచనలు జారీ

హైదరాబాద్ వాతావరణ కేంద్రం సమాచారం ప్రకారం, రాబోయే ఐదు రోజులు తెలంగాణలో విస్తారంగా వర్షాలు కురిసే అవకాశం ఉంది. రాష్ట్రంలో చాలా చోట్ల తేలికపాటి నుండి ఓ మోస్తారు వర్షాలు, కొన్ని చోట్ల భారీ వర్షాలు కురవనున్నాయి. పగటి ఉష్ణోగ్రతలు 26 నుండి 35 డిగ్రీల సెల్సియస్, రాత్రి ఉష్ణోగ్రతలు 22 నుండి 26 డిగ్రీల సెల్సియస్ మధ్య నమోదు కావచ్చని వాతావరణ శాఖ వెల్లడించింది.

ఈ నేపథ్యంలో శంకరి తెలంగాణ వ్యవసాయ విశ్వవిద్యాలయం రైతులకు పలు సూచనలు చేసింది. భారీ వర్షాలు కురిసే అవకాశం ఉన్నందున పొలాల నుండి మురుగు నీటిని తీసివేయడానికి కాలువలు ఏర్పాటు చేసుకోవాలని సూచించింది. పంట పొలాల్లో మందుల పిచికారి తాత్కాలికంగా వాయిదా వేయాలి.

వరి సాగు చేసే రైతులు నీరు ఆలస్యంగా విడుదలయ్యే ప్రాంతాల్లో పెసరను పైరుగా లేదా పచ్చిరొట్టగా విత్తుకోవాలి. వర్షాధార పంటలను నేల 15 నుండి 20 సెంటీమీటర్ల లోతు తడిచిన తర్వాత మాత్రమే సరైన పద్ధతుల్లో విత్తుకోవాలి. చెరువులు, కుంటలకు దూరంగా, తక్కువ నీటి వసతి ఉన్న రైతులు తక్కువ నీటి అవసరమున్న ఆరుతడి పంటలు సాగు చేయాలి.

కోతకు సిద్ధంగా ఉన్న టమాటా, వంగ, బెండ, మిర్చి, ఆకుకూరలు వంటి కూరగాయలను వెంటనే కోసుకోవాలి. ఉరుములు, మెరుపులు సంభవించే అవకాశం ఉన్నందున రైతులు, పశువులు చెట్ల కింద నిలబడకూడదు. విద్యుత్ స్తంభాలు, తీగలు, నీటి కుంటలకు దూరంగా ఉండాలి.

నీరు సమృద్ధిగా ఉన్న ప్రాంతాల్లో మధ్యకాలిక, స్వల్పకాలిక వరి రకాల నారుమడి పోయడానికి, 25-30 రోజుల వయసున్న దీర్ఘకాలిక వరి రకాల నాట్లు వేయడానికి ఇది అనుకూల సమయమని విశ్వవిద్యాలయం తెలిపింది. తెలంగాణ సోనా, ఆర్ఎన్ఆర్ 15048 వంటి విత్తనాలను జూలై మొదటి వారంలోనే నారుమడి పోసుకోవాలని సూచించింది.