ఏపీకి భారీ వర్ష హెచ్చరిక: పలు జిల్లాల్లో ఉరుములు, మెరుపులు

వాయువ్య బంగాళాఖాతంలో కొనసాగుతున్న అల్పపీడనం రానున్న 24 గంటల్లో వాయుగుండంగా మారే అవకాశం ఉందని ఏపీ విపత్తుల నిర్వహణ సంస్థ తెలిపింది. ఈ ప్రభావంతో రెండు రోజుల పాటు ఈదురుగాలులతో కూడిన వర్షాలు కురుస్తాయని వాతావరణ శాఖ అంచనా వేసింది.

ఈ రోజు శ్రీకాకుళం, విజయనగరం, పోలవరం జిల్లాల్లో అక్కడక్కడ పిడుగులతో కూడిన వర్షాలు కురిసే అవకాశం ఉంది. విశాఖ, ఏలూరు, నెల్లూరు, తిరుపతి జిల్లాల్లోనూ వర్షాలు పడే అవకాశం ఉంది. పార్వతీపురం మన్యం, అల్లూరి సీతారామరాజు, అనకాపల్లి, కాకినాడ, కోనసీమ జిల్లాల్లోనూ వర్షాలు కురిసే అవకాశం ఉంది. తూర్పుగోదావరి, పశ్చిమ గోదావరి, కృష్ణ, మార్కాపురం, ప్రకాశం, చిత్తూరు జిల్లాల్లోనూ వర్షాలు పడతాయని అధికారులు తెలిపారు.

రేపు ఉత్తరాంధ్ర జిల్లాల్లో ఓ మోస్తారు వర్షాలు కురిసే అవకాశం ఉంది. గంటకు 40 నుంచి 60 కిలోమీటర్ల వేగంతో ఈదురుగాలులు వీస్తున్నాయి. ఉరుములు, మెరుపులతో కూడిన వర్షాలు కొన్ని ప్రాంతాల్లో కురుస్తున్నాయి. పార్వతీపురం మన్యం, అల్లూరి సీతారామరాజు జిల్లాల్లో భారీ వర్షపాతం నమోదవుతోంది.

మత్స్యకారులు సముద్రంలోకి వెళ్లరాదని వాతావరణ శాఖ హెచ్చరించింది. ఇప్పటికే సముద్రంలో ఉన్నవారు తక్షణం తీరానికి చేరుకోవాలని అధికారులు కోరారు. లోతట్టు ప్రాంతాల ప్రజలు అప్రమత్తంగా ఉండాలని సూచించారు. ఈదురుగాలుల సమయంలో పెద్ద చెట్ల కింద నిలబడవద్దని చెప్పారు. అత్యవసరం అయితే తప్ప ఇళ్ల నుంచి బయటకు రావద్దని అధికారులు సూచించారు.

ఈ ఏడాది వర్షపాతం తక్కువగా నమోదైంది. రిజర్వాయర్లు దిగువకు చేరుతున్న నేపథ్యంలో వర్షపు నీటిని రిజర్వాయర్లకు మళ్లించేందుకు అధికారులు చర్యలు తీసుకుంటున్నారు.