తెలంగాణలో మూడు రోజుల వర్ష హెచ్చరిక; ఉత్తర, ఈశాన్య జిల్లాలకు అలెర్ట్

తెలంగాణ రాష్ట్రంలో వచ్చే మూడు రోజుల వర్ష హెచ్చరికను వాతావరణ శాఖ జారీ చేసింది. ఉత్తర, ఈశాన్య జిల్లాల్లో ఒకటి రెండు చోట్ల భారీ వర్షాలు కురిసే అవకాశం ఉందని అధికారులు తెలిపారు. ఆదిలాబాద్, కొమరం భీమ్, నిర్మల్, మంచిర్యాల, జగిత్యాల, వరంగల్, మహబూబాబాద్ జిల్లాల్లో భారీ వర్షం సూచన ఉంది. రాష్ట్ర వ్యాప్తంగా తేలిక పాటి నుంచి మోస్తరు వర్షాలు కురిసే అవకాశం ఉందని శాఖ పేర్కొంది.

గురువారం హైదరాబాద్‌తో పాటు పలు జిల్లాల్లో వర్షం కురిసింది. వనస్థలిపురం, ఎల్బీ నగర్, కొత్తపేట తదితర ప్రాంతాల్లో భారీ వర్షం పడగా, మియాపూర్, బాచుపల్లి, కుత్బుల్లాపూర్ ప్రాంతాల్లో చిరుజల్లులు పడ్డాయి. నిర్మల్ జిల్లాలోని కడం దస్తూరాబాద్ మండలాల్లో భారీ వర్షం కురిసింది, రోడ్లపైకి నీరు చేరి రాకపోకలు నిలిచిపోయాయి. లోతట్టు ప్రాంతాలు జలమయమయ్యాయి.

వాతావరణ శాఖ అంచనా ప్రకారం, ఈ ఏడాది ఇప్పటివరకు రాష్ట్రంలో 38 శాతం లోటు వర్షపాతం నమోదయింది. ప్రస్తుత వాయుగుండం ప్రభావంతో వర్షాలు కురుస్తున్నాయి; అయితే త్వరలోనే వర్షాలు తగ్గి పొడి వాతావరణం ఏర్పడే అవకాశం ఉంది. ఆగస్టు మొదటి వారంలో మరో అల్పపీడనం ఏర్పడితే మళ్లీ వర్షాలు కురిసే చాన్స్ ఉందని అధికారులు చెప్పారు.

మరోవైపు, కృష్ణా నదికి ఎగువ నుంచి వరద ప్రవాహం పెరగడంతో జూరాల ప్రాజెక్ట్‌కు భారీగా నీరు వస్తోంది. నారాయణపూర్ ప్రాజెక్ట్ నిండడంతో గేట్లు ఎత్తి నీటిని విడుదల చేస్తున్నారు. దీంతో జూరాల ప్రాజెక్ట్ వరద ప్రవాహం పెరిగి ప్రాజెక్ట్ నీటిమట్టం పూర్తి స్థాయికి చేరే అవకాశం ఉందని అధికారులు తెలిపారు. ఆయకట్టు రైతులు ఈ పరిస్థితితో సంతోషం వ్యక్తం చేస్తున్నారు.