తెలంగాణలో 7 జిల్లాలకు రెడ్ అలర్ట్ — ఉష్ణోగ్రతలు 47 డిగ్రీలకు చేరే అవకాశం

హైదరాబాద్ వాతావరణ శాఖ తెలంగాణలోని 7 జిల్లాలకు రెడ్ అలర్ట్ జారీ చేసింది. ఆదిలాబాద్, కొమురంభీం ఆసిఫాబాద్, జగిత్యాల, నిర్మల్, మంచిర్యాల, రాజన్న సిరిసిల్ల, నిజామాబాద్ జిల్లాల్లో తీవ్రమైన వడగాలు వీచే అవకాశం ఉందని తెలిపింది.

రాబోయే మూడు నాలుగు రోజుల్లో ఉష్ణోగ్రతలు 46 నుంచి 47 డిగ్రీల సెల్సియస్ వరకు నమోదయ్యే అవకాశం ఉందని వాతావరణ శాఖ అధికారులు తెలిపారు. ఈ నెల 21 వరకు ప్రజలు అప్రమత్తంగా ఉండాలని హెచ్చరించారు.

నిన్న నిజామాబాద్ జిల్లా భీంపూర్ మండలంలో 45.7 డిగ్రీల సెల్సియస్ నమోదైంది. నిర్మల్ జిల్లా దస్తూరాబాద్‌లో 45.3 డిగ్రీలు, కామారెడ్డి జిల్లా పాన్సువాడ మండలంలో 45.2 డిగ్రీలు నమోదయ్యాయి.

ఈ నెల 26 నుంచి నైరుతి రుతుపవనాలు అండమాన్ మీదిగా ప్రయాణించి కేరళ తీరాన్ని తాకనున్నాయని వాతావరణ శాఖ తెలిపింది. ఆ తర్వాత జూన్ మొదటి వారం నాటికి తెలంగాణ, ఆంధ్రప్రదేశ్‌లలోకి రుతుపవనాలు ప్రవేశించే అవకాశం ఉందని అంచనా వేశారు.

మధ్యాహ్నం 11 గంటల నుంచి సాయంత్రం 4 గంటల వరకు అవసరం లేకుండా బయటికి రావొద్దని వైద్యులు సూచించారు. వృద్ధులు, గర్భిణులు, చిన్నపిల్లలు ప్రత్యేకంగా జాగ్రత్తగా ఉండాలని హెచ్చరించారు. నీళ్లు, ORS, కొబ్బరి నీళ్లు, మజ్జిగ, నిమ్మరసం వంటి ద్రవ పదార్థాలు ఎక్కువగా తీసుకోవాలని డాక్టర్లు పేర్కొన్నారు.