తెలంగాణ: లైఫ్ ఆథెంటికేషన్‌తో లక్ష మంది పైగా అనర్హుల పెన్షన్లు రద్దు

తెలంగాణ ప్రభుత్వం సామాజిక భద్రతా పెన్షన్ల వ్యవస్థలో అనర్హులను గుర్తించేందుకు లైఫ్ ఆథెంటికేషన్ ప్రక్రియను తప్పనిసరి చేసింది. డిజిటల్ వెరిఫికేషన్ ద్వారా రాష్ట్రవ్యాప్తంగా లక్ష మందికి పైగా అనర్హులు పెన్షన్లు పొందుతున్నట్లు తేలింది.

క్షేత్ర స్థాయి పరిశీలనలో కొన్నేళ్ల క్రితం మరణించిన వారి పేర్లను జాబితా నుండి తొలగించకపోవడంతో పాటు, కొందరు అనర్హులు ఆ పేర్లను ఉపయోగించి ప్రతి నెలా డబ్బులు డ్రా చేస్తున్నట్లు గుర్తించారు.

ఈ నేపథ్యంలో, గుర్తించిన అనర్హుల పేర్లను లబ్ధిదారుల జాబితా నుండి శాశ్వతంగా తొలగించాలని ఉన్నతాధికారులు నిర్ణయించారు. దీంతో ప్రతి నెల కోట్ల రూపాయల ప్రజాధనం ఆదా కానుంది.

మిగిలే నిధులను నిజమైన లబ్ధిదారులకు అందించే ప్రణాళికలో భాగంగా, ఇప్పటికే రాష్ట్రంలో 2 లక్షల మంది కొత్త అర్హులకు పెన్షన్లు మంజూరు చేసే ప్రక్రియ జరుగుతోంది. తాజాగా తొలగించిన లక్ష మంది స్థానంలో మరో లక్ష మంది కొత్త లబ్ధిదారులను ఎంపిక చేయనున్నట్లు అధికారులు తెలిపారు. దీంతో రాష్ట్రంలో మొత్తం 3 లక్షల మంది నిరుపేదలకు కొత్త పెన్షన్లు అందనున్నాయి.

గ్రామ, వార్డు స్థాయిలో అర్హులను గుర్తించే సర్వే ప్రక్రియ చివరి దశలో ఉందని, త్వరలో లబ్ధిదారుల పూర్తి జాబితాను విడుదల చేసి పెన్షన్ల పంపిణీ ప్రారంభించనున్నట్లు సచివాలయ వర్గాలు వెల్లడించాయి.