తెలంగాణలో భూముల మార్కెట్ విలువల సవరణ; స్టాంప్‌డ్యూటీ, రిజిస్ట్రేషన్ ఛార్జీలు పెరగనున్నాయి

తెలంగాణ రెవెన్యూ శాఖ మంత్రి పొంగులేటి శ్రీనివాస్ రెడ్డి, రాష్ట్రవ్యాప్తంగా భూముల మార్కెట్ విలువలను సవరించినట్లు ప్రకటించారు. కొత్త విలువలు రేపటి నుంచి అమల్లోకి వస్తాయని తెలిపారు.

ఔటర్ రింగ్ రోడ్, రీజనల్ రింగ్ రోడ్ వంటి ప్రాజెక్టులు, పారిశ్రామిక వృద్ధి, పట్టణ-గ్రామీణ డిమాండ్ ఆధారంగా ఈ విలువలను నిర్ణయించినట్లు మంత్రి వివరించారు. 144 సబ్ రిజిస్ట్రార్ కార్యాలయాల పరిధిలో క్షేత్ర స్థాయి అధ్యయనాలు, రిజిస్ట్రేషన్ల డేటా విశ్లేషణ, నిపుణుల కమిటీ సూచనలను పరిగణనలోకి తీసుకున్నారు.

ఇప్పటికే అధిక విలువలు ఉన్న ప్రాంతాల్లో పెంపు ఉండదని ప్రభుత్వం స్పష్టం చేసింది. కానీ హెచ్ఎండిఏ, జిహెచ్ఎంసి కీలక ప్రాంతాల్లో వ్యవసాయ భూములు, నివాస ప్లాట్లు, ఫ్లాట్లకు కొత్త కనీస ధరలు నిర్ణయించారు. దీనివల్ల స్టాంప్ డ్యూటీ, రిజిస్ట్రేషన్ చార్జీలు పెరగబోతున్నాయి. ఇది ఆస్తి కొనుగోలుదారులు, పెట్టుబడిదారులపై ప్రభావం చూపే అవకాశం ఉంది.

మార్కెట్ ధరలతో ప్రభుత్వ విలువలకున్న వ్యత్యాసాన్ని తగ్గించడం, లావాదేవీల్లో పారదర్శకత పెంచడం ఈ సవరణ ప్రధాన లక్ష్యాలని మంత్రి తెలిపారు. నిర్మాణ సామాగ్రి ధరల పెరుగుదల దృష్ట్యా ఆర్‌సీసీ, నాన్ ఆర్‌సీసీ నిర్మాణాల విలువల్లోనూ మార్పులు చేశారు.