తెలంగాణ RTC విలీనంపై స్పష్టత లేదు — జూన్ 2న ప్రకటన చేయాలని కార్మిక సంఘాల డిమాండ్

తెలంగాణ RTC ని ప్రభుత్వంలో విలీనం చేయాలనే డిమాండ్ మళ్లీ తీవ్రమైంది. ఇటీవల జేఎసి నాయకులతో జరిగిన సమావేశంలో విలీన ప్రక్రియను త్వరగా పూర్తి చేస్తామని ప్రభుత్వం హామి ఇచ్చింది. అయితే నిర్దిష్టమైన తేదీ ఇవ్వలేదు.

కార్మిక సంఘాలు జూన్ 2న అధికారిక ప్రకటన చేయాలని డిమాండ్ చేస్తున్నాయి. ఆ రోజు ఎర్ర బ్యాడ్జీలు ధరించి విధులు నిర్వహిస్తామని జేఎసి ప్రకటించింది. ప్రతి నెలా 200 నుండి 250 మంది ఉద్యోగులు పదవీ విరమణ చేస్తున్నారని, ఇప్పటికే 17,000 మంది సర్వీసు నుండి వెళ్లిపోయారని నేతలు చెప్తున్నారు.

ప్రభుత్వం మాత్రం ముందుగా RTC లో అంతర్గత ఎన్నికలు నిర్వహించాలని, గెలిచిన ప్రతినిధులతో కమిటీ వేయాలని, ఆ కమిటీ నివేదిక ఆధారంగా నిర్ణయం తీసుకోవాలని యోచిస్తోంది. ఈ ప్రక్రియ పూర్తికి మరికొన్ని నెలలు పట్టవచ్చని ఉద్యోగ వర్గాలు భావిస్తున్నాయి.

ఫిట్మెంట్, pay scales, DA లు తమకూ వర్తిస్తాయా అనే ప్రశ్నలు ఉద్యోగులను కలవరపెడుతున్నాయి. పదవీ విరమణకు దగ్గరలో ఉన్న ఉద్యోగులు ముఖ్యంగా ఆందోళన వ్యక్తం చేస్తున్నారు.

డీజిల్ ధరలు, నిర్వహణ వ్యయాలు, అప్పులు వంటి ఆర్థిక సమస్యల నేపథ్యంలో పూర్తి స్థాయి విలీనం జరిగితే ప్రభుత్వంపై భారీ ఆర్థిక భారం పడే అవకాశం ఉందని అధికార వర్గాలు అభిప్రాయపడుతున్నాయి. జూన్ 2న స్పష్టత రాకపోతే కార్మిక సంఘాలు ఆందోళనకు దిగే అవకాశం ఉందని జేఎసి హెచ్చరించింది.