రైతు డిస్కమ్‌పై తెలంగాణలో రాజకీయ వివాదం

తెలంగాణ ప్రభుత్వం వ్యవసాయ విద్యుత్ కోసం ప్రత్యేక డిస్కమ్ ఏర్పాటు చేయాలని నిర్ణయించింది. దీన్ని TGRPDCL పేరుతో ఆరంభించాలని భావిస్తున్నారు. జూన్ 2 నుంచి ఈ కొత్త సంస్థ కార్యకలాపాలు మొదలు కావాల్సి ఉంది.

ప్రస్తుతం తెలంగాణలో NPDCL, SPDCL అనే రెండు డిస్కమ్‌లు విద్యుత్ సరఫరా చేస్తున్నాయి. రాష్ట్రంలో సుమారు 30 లక్షలకు పైగా వ్యవసాయ విద్యుత్ కనెక్షన్లు ఉన్నాయి. దాదాపు 5.5 లక్షల ట్రాన్స్‌ఫార్మర్లను కొత్త డిస్కమ్ పరిధిలోకి తీసుకొస్తారు.

ప్రభుత్వం ప్రకారం, వ్యవసాయ లోడ్‌ను వేరు చేయడం వల్ల రైతులకు నిరంతర ఉచిత విద్యుత్ అందుతుంది. రైతుల బోర్లకు smart meters పెట్టడం జరగదని, ఉచిత విద్యుత్ విధానం 100% కొనసాగుతుందని ప్రభుత్వం స్పష్టం చేసింది. వ్యవసాయ సబ్సిడీ సొమ్ము నేరుగా కొత్త సంస్థకు చేరుతుందని, పాత డిస్కమ్‌లు నష్టాల నుంచి బయటపడతాయని కూడా చెప్తోంది.

BRS, BJP మాత్రం ఈ నిర్ణయాన్ని వ్యతిరేకిస్తున్నాయి. భవిష్యత్తులో రైతు బోర్లకు మీటర్లు పెట్టి ఉచిత విద్యుత్ రద్దు చేసేందుకే ఈ డిస్కమ్ తీసుకొస్తున్నారని ఆరోపిస్తున్నాయి. ప్రస్తుతం డిస్కమ్‌లకు ప్రభుత్వం నుంచి 54,000 కోట్లకు పైగా బకాయిలు రావాల్సి ఉందని, ఈ భారీ బకాయిలను కొత్త సంస్థ పరిధిలోకి నెట్టాలని చూస్తున్నారని BRS నేత హరీష్ రావు ఆరోపించారు.

ERC (Electricity Regulatory Commission) లైసెన్స్ విషయంపై ప్రజాభిప్రాయ సేకరణ జరిపింది. ERC అనుమతి లేకుండా డిస్కమ్ ఆరంభించడం సాధ్యమేనా అని BRS ప్రశ్నిస్తోంది. రైతు సంఘాలు కూడా ఈ ప్రతిపాదనను వ్యతిరేకిస్తున్నాయి.