వేసవి సెలవుల అనంతరం తెలంగాణలో స్కూళ్లు పునఃప్రారంభం; 62 లక్షల మంది విద్యార్థులు బడి బాట

వేసవి సెలవులు ముగిసిన తర్వాత తెలంగాణలోని ప్రభుత్వ పాఠశాలలు సోమవారం నుంచి తిరిగి ప్రారంభమయ్యాయి. ప్రతి ఏటా జూన్ 12 నుంచి స్కూళ్లు తెరచుకునే అలవాటు ఉండగా, ఈ ఏడాది జూన్ 15 నుంచి మొదలయ్యాయి.

రాష్ట్ర వ్యాప్తంగా సుమారు 40 వేల ప్రభుత్వ స్కూళ్లలో 62 లక్షలకు పైగా విద్యార్థులు చదువుతున్నారు. ఈ విద్యా సంవత్సరంలో విద్యార్థుల నమోదు కనీసం 10 శాతం పెంచాలని ప్రభుత్వం లక్ష్యంగా పెట్టుకుంది.

పలు ప్రైవేట్ స్కూళ్లు మాత్రం జూన్ 17 నుంచి తెరచుకుంటాయి. సోమవారం అమావాస్య కావడంతో 15, 16 తేదీల్లో విద్యార్థులు పాఠశాలలకు వచ్చి పుస్తకాలు, యూనిఫామ్లు తీసుకెళ్లాలని ప్రైవేట్ స్కూళ్లు తల్లిదండ్రులకు సందేశాలు పంపించాయి.

తొలి రోజే విద్యార్థులకు పాఠ్యపుస్తకాలు, వర్క్‌బుక్‌లు అందించేందుకు విద్యా శాఖ అన్ని ఏర్పాట్లు పూర్తి చేసింది. ఈ ఏడాది ప్రభుత్వ పాఠశాలల్లో కొత్తగా 2,769 ప్రీ ప్రైమరీ తరగతులను ప్రారంభించనుంది. చిన్నారులను ఆకర్షించేలా తరగతి గదులను ప్లే స్కూళ్ల తరహాలో రంగురంగులగా తీర్చిదిద్దినట్లు అధికారులు తెలిపారు.