తెలంగాణలో పాఠశాలలు తిరిగి ప్రారంభం, CM Breakfast పథకం మొదలు

తెలంగాణలో 50 రోజుల వేసవి సెలవుల అనంతరం నేటి నుంచి ప్రభుత్వ పాఠశాలలు తిరిగి ప్రారంభమయ్యాయి. రాష్ట్రవ్యాప్తంగా దాదాపు 40,000 పాఠశాలలు తెరుచుకోగా, 62 లక్షల మంది విద్యార్థులు తరగతులకు హాజరయ్యారు.

మొదటి రోజే విద్యార్థులకు పాఠ్యపుస్తకాలు, నోట్‌బుక్స్, వర్క్‌బుక్స్ పంపిణీ చేశారు. గతంలో 5వ తరగతి వరకు మాత్రమే వర్క్‌బుక్స్ ఇచ్చేవారు. ఈ సంవత్సరం నుంచి 10వ తరగతి వరకు వర్క్‌బుక్స్ అందిస్తున్నట్లు పాఠశాల ప్రిన్సిపల్ తెలిపారు. యూనిఫామ్ మాత్రం ఆలస్యంగా అందించే అవకాశం ఉంది. ప్రైవేట్ పాఠశాలలకు దీటుగా ప్రభుత్వ పాఠశాలలను బలోపేతం చేయడానికి ఈ సంవత్సరం 27,000కు పైగా పాఠశాలల్లో ప్రాథమిక తరగతులు ప్రారంభించారు. విద్యార్థుల నమోదు 10% పెంచాలని ప్రభుత్వం లక్ష్యంగా పెట్టుకుంది.

ఈ సంవత్సరం నుంచి CM Breakfast పథకం కూడా అమల్లోకి వచ్చింది. ప్రస్తుతం 8 జిల్లాల్లోని 1,269 పాఠశాలల్లో విద్యార్థులకు మధ్యాహ్న భోజనంతో పాటు ఉదయం అల్పాహారం అందిస్తున్నారు. వారంలో మూడు రోజులు పాలు, నాలుగు రోజులు రాగి జావ ఇవ్వనున్నారు. మిగతా పాఠశాలల్లో దశలవారీగా ఈ పథకాన్ని విస్తరించనున్నారు. అదనంగా, జూలై నుంచి 8,500 పాఠశాలల్లో AI డిజిటల్ తరగతులు ప్రారంభించాలని ప్రభుత్వం నిర్ణయించింది.

పాఠశాలలు జూన్ 12న తెరవాల్సి ఉండగా, తల్లిదండ్రులు, ప్రైవేట్ స్కూళ్ల నుంచి వచ్చిన విజ్ఞప్తి మేరకు ఈ నెల 15వ తేదీకి మార్చారు. ఈరోజు అమావాస్య నేపథ్యంలో కొన్ని ప్రైవేట్ పాఠశాలలు రేపటి నుంచి తరగతులు ప్రారంభిస్తున్నాయి.