తెలంగాణలో తీవ్ర వడదెబ్బ హెచ్చరిక: ఐదు జిల్లాలకు రెడ్ అలర్ట్

తెలంగాణలో వేసవి తీవ్రత పెరిగింది. రానున్న నాలుగు రోజుల పాటు ఉష్ణోగ్రతలు మరింత ఎక్కువవుతాయని IMD హెచ్చరించింది.

ఈరోజు ఐదు జిల్లాలకు రెడ్ అలర్ట్ జారీ చేశారు. ఆ జిల్లాలు: ఆదిలాబాద్, కొమరంభీం అసిఫాబాద్, నిర్మల్, నిజామాబాద్, మంచిర్యాల. ఈ జిల్లాల్లో 45 డిగ్రీలకు పైగా గరిష్ట ఉష్ణోగ్రతలు నమోదవుతాయని అధికారులు తెలిపారు. రేపు 14 జిల్లాలకు రెడ్ అలర్ట్ విస్తరిస్తుందని IMD పేర్కొంది.

మిగిలిన 28 జిల్లాలకు ఆరెంజ్ అలర్ట్ అమలులో ఉంది. ఆ జిల్లాల్లో 41 నుండి 44 డిగ్రీల మధ్య ఉష్ణోగ్రతలు నమోదవుతాయని అంచనా. ఉత్తర తెలంగాణ, తూర్పు తెలంగాణ జిల్లాల్లో వడగాలులు వీచే అవకాశం ఉంది.

నిన్న నమోదైన గరిష్ట ఉష్ణోగ్రతలు: ఆదిలాబాద్ 45°C, నిజామాబాద్ 44°C, రామగుండం 43°C, హైదరాబాద్ 41°C. రానున్న రోజుల్లో ఉష్ణోగ్రతలు మరో 2 నుండి 3 డిగ్రీలు పెరిగే అవకాశం ఉందని IMD తెలిపింది.

మహబూబ్‌నగర్, నాగర్‌కర్నూల్, వనపర్తి, నారాయణపేట, జోగులాంబ గద్వాల్, సంగారెడ్డి, వికారాబాద్ జిల్లాల్లో 40 నుండి 50 కి.మీ వేగంతో గాలులు వీచే అవకాశం ఉంది. ఆ జిల్లాల్లో నేడు రేపు వర్షాలు పడే అవకాశం కూడా ఉంది.

మధ్యాహ్నం 11 గంటల నుండి 4 గంటల మధ్య బయటికి వెళ్లొద్దని IMD సూచించింది. తప్పనిసరిగా బయటికి వెళ్ళే వారు గొడుగు, నీటి బాటిల్ తప్పనిసరిగా తీసుకెళ్లాలని వాతావరణ శాఖ, ఆరోగ్య శాఖ తెలిపాయి. వడదెబ్బ వల్ల మరణాలు నమోదవుతున్న నేపథ్యంలో ఈ హెచ్చరికలు జారీ అయ్యాయి. వరి కోతలు జరుగుతున్న నేపథ్యంలో రైతులు కూడా అప్రమత్తంగా ఉండాలని అధికారులు కోరారు.