తెలంగాణలో ఈ నెల 25 నుంచి ఓటర్ల ప్రత్యేక సమగ్ర సవరణ సర్వే

కేంద్ర ఎన్నికల సంఘం ఆదేశాలతో తెలంగాణలో ఈ నెల 25 నుంచి ప్రత్యేక సమగ్ర సవరణ (SSR) సర్వే మొదలవుతుంది.

ఈ సర్వే కోసం ఈ నెల 15 నుంచి 24 వరకు మూడు దశల్లో సన్నాహక కార్యక్రమాలు జరుగుతాయి. మొదటి దశలో జిల్లా ఎన్నికల అధికారులు బీఎల్ఓలకు బాధ్యతలు కేటాయించి ప్రణాళిక రూపొందిస్తారు. రెండో దశలో డీఈఓ, ఈఆర్ఓ, ఏఈఆర్ఓలు, బీఎల్ఓ పర్యవేక్షకులు బీఎల్ఓలకు శిక్షణ ఇస్తారు. మూడో దశలో ఇంటింటికీ అందించే ఎన్యుమరేషన్ పత్రాలను ముద్రిస్తారు.

సన్నాహాలు పూర్తయిన తర్వాత ఈ నెల 25 నుంచి జూలై 24 వరకు బీఎల్ఓలు ఇంటింటికీ వెళ్లి సర్వే నిర్వహిస్తారు. జూలై 31న ముసాయిదా ఓటర్ల జాబితాను ప్రదర్శిస్తారు. జూలై 31 నుంచి ఆగస్టు 30 వరకు ఫిర్యాదులు, అభ్యంతరాలు స్వీకరిస్తారు. సందేహాలున్న ఓటర్లకు నోటీసులు జారీ చేసి, వారి గుర్తింపు కార్డులను పరిశీలిస్తారు. అక్టోబర్ 1న ఓటర్ల తుది జాబితా విడుదలవుతుంది.