తెలంగాణలో కల్తీ విత్తనాలపై టాస్క్‌ఫోర్స్ దాడులు

తెలంగాణలో వ్యవసాయ శాఖ, పోలీసులు సంయుక్తంగా ఏర్పాటు చేసిన టాస్క్‌ఫోర్స్ కల్తీ విత్తనాలపై చర్యలు చేపట్టింది. వరంగల్, మహబూబాబాద్ జిల్లాల్లో తనిఖీలు ముమ్మరం చేశారు.

సీజన్ ప్రారంభమైన నేపథ్యంలో రైతులు సాగు పనులు మొదలుపెట్టారు. ఉమ్మడి వరంగల్ జిల్లాలో 16 నుంచి 18 లక్షల ఎకరాల్లో సాగు జరుగుతుందని అధికారులు అంచనా వేశారు. ఎక్కువగా వరి, పత్తి సాగుపై రైతులు ఆసక్తి చూపుతున్నారు.

ఆంధ్రప్రదేశ్‌లోని గుంటూరు, విజయవాడ, కర్నూలు జిల్లాలతో పాటు తెలంగాణలోని మహబూబ్‌నగర్ నుంచి కల్తీ విత్తనాలు సరఫరా అవుతున్నట్లు సమాచారం వచ్చింది. దీంతో అధికారులు తనిఖీలు చేపట్టారు. మహబూబాబాద్ జిల్లా తొర్రూరు మండలం టీక్యా తండాలో 28 కిలోల కల్తీ పత్తి విత్తనాలను స్వాధీనం చేసుకొని, వాటిని సరఫరా చేసిన వ్యాపారిని అరెస్టు చేశారు.

గతంలో మహబూబాబాద్, డోర్నకల్, ములుగు, భూపాలపల్లి, నరసంపేట ప్రాంతాల్లో ఇలాంటి కల్తీ విత్తనాలు అమ్మి రైతులను మోసం చేసిన సంఘటనలు ఉన్నాయి. ప్రస్తుతం అధికారులు అలాంటి పరిస్థితి రాకుండా కట్టడి చేస్తున్నారు.

ప్రభుత్వ అనుమతి లేని విత్తనాలు అమ్మితే పీడీ యాక్ట్ కింద కేసులు నమోదు చేస్తామని అధికారులు హెచ్చరించారు. రైతులు అప్రమత్తంగా ఉండి, అనుమతి పొందిన డీలర్ల నుంచే విత్తనాలు కొనాలని, రసీదు తప్పనిసరిగా తీసుకోవాలని సూచించారు. విత్తనాలు మొలకెత్తకపోయినా, పంట సరిగా రాకపోయినా కంపెనీల నుంచి నష్టపరిహారం పొందే అవకాశం ఉందని వ్యవసాయ అధికారులు తెలిపారు.