తెలంగాణ ఆలయాల్లో 1,048 కేజీల బంగారం నిల్వలు : అత్యధికం వేములవాడ రాజన్నకు

తెలంగాణ దేవాదాయ శాఖ గణాంకాల ప్రకారం, రాష్ట్రంలో దేవాదాయ శాఖ అధీనంలో 704 ఆలయాలు ఉన్నాయి. ఈ ఆలయాలన్నింటిలో కలిపి మొత్తం 1,048 కేజీల బంగారం, 38,783 కేజీల వెండి నిల్వలు ఉన్నాయి.

ఇందులో వేములవాడ రాజన్న ఆలయం 97 కేజీల బంగారంతో అగ్రస్థానంలో ఉంది. ఈ ఆలయంలో 4,930 కేజీల వెండి వస్తువులు కూడా ఉన్నాయి. బంగార నిల్వల్లో భద్రాద్రి రామయ్య ఆలయం 61 కేజీలతో రెండో స్థానంలో ఉంది. ఇక్కడ స్వామి అమ్మవార్లకు 61 కేజీల బంగారు ఆభరణాలే కాక 940 కేజీల వెండి వస్తువులు ఉన్నాయి. యాదగిరిగుట్ట లక్ష్మీనరసింహస్వామి ఆలయంలో 61 కేజీల బంగారం, 2,312 కేజీల వెండితో మూడో స్థానంలో నిలిచింది.

నిర్మల్ జిల్లా బాసరలోని జ్ఞాన సరస్వతి అమ్మవారి ఆలయంలో సుమారు 18 కేజీల బంగారం, 952 కేజీల వెండి ఉన్నాయి. ఇక్కడి బంగారు ఆభరణాలు బ్యాంకు లాకర్, ఆలయ లాకర్, అర్చక లాకర్లలో భద్రపరిచారు. నిత్యాలంకరణ కోసం 5 కేజీల 550 గ్రాముల బంగారం వినియోగిస్తున్నట్లు లెక్కలు చెబుతున్నాయి.

దేవతలకు బంగారాన్ని సమర్పించే సంప్రదాయం తెలంగాణలో కొనసాగుతోంది. ఈ నిల్వలు ఆలయ సంపదలో భాగంగా భద్రంగా ఉంచబడుతున్నాయి.