తిరుమలలో భక్తుల రద్దీ; సెప్టెంబర్ 15 నుంచి సాలకట్ల బ్రహ్మోత్సవాలు

తిరుమలలో భక్తుల రద్దీ కొనసాగుతోంది. వైకుంఠం క్యూ కాంప్లెక్స్‌లోని 31 కంపార్ట్‌మెంట్లు నిండాయి. క్యూ కాంప్లెక్స్ బయట కూడా భక్తులు లైన్లలో వేచి ఉన్నారు.

TTD అధికారులు తెలిపిన వివరాల ప్రకారం, టోకెన్ లేని భక్తులకు సర్వదర్శనానికి 20 గంటలు పడుతోంది. ప్రత్యేక ప్రవేశ దర్శనానికి 4 గంటలు పడుతోంది. సర్వదర్శనం టోకెన్ ఉన్న వారికి 6 గంటలు పడుతోంది.

తిరుమల శ్రీవారి వార్షిక సాలకట్ల బ్రహ్మోత్సవాలకు TTD ఏర్పాట్లు చేస్తోంది. ఈ ఏడాది అధిక మాసం కారణంగా రెండు బ్రహ్మోత్సవాలు నిర్వహించనున్నారు. ఒకటి సెప్టెంబర్‌లో, మరొకటి అక్టోబర్‌లో జరుగుతుంది.

సెప్టెంబర్ 14న అంకురార్పణ జరుగుతుంది. సెప్టెంబర్ 15 నుంచి 23 వరకు సాలకట్ల బ్రహ్మోత్సవాలు జరుగుతాయి. సెప్టెంబర్ 15న రాష్ట్ర ప్రభుత్వం తరపున CM దంపతులు శ్రీవారికి పట్టు వస్త్రాలు సమర్పిస్తారు. అదే రోజు పలు అభివృద్ధి కార్యక్రమాలు కూడా ప్రారంభిస్తారు.

గ్యాలరీల్లో భక్తులు ఇబ్బంది పడకుండా వాహన సేవలు చూసేలా ఏర్పాట్లు చేయాలని EO అధికారులను ఆదేశించారు. సెప్టెంబర్ మొదటి వారం లోపు ఇంజనీరింగ్ పనులు పూర్తి చేయాలన్నారు. బ్రహ్మోత్సవాలకు వచ్చే భక్తులకు మెరుగైన వసతులు కల్పించే అంశంపై చర్చించినట్టు అదనపు EO C.H. Venkaiah Chowdary తెలిపారు.