పాఠశాలల పునఃప్రారంభం రోజే పాఠ్యపుస్తకాలు: తెలంగాణ ప్రభుత్వ ఏర్పాట్లు

తెలంగాణ ప్రభుత్వం ఈ విద్యా సంవత్సరం పాఠశాలల పునఃప్రారంభం రోజునే విద్యార్థులకు పాఠ్యపుస్తకాలు అందించాలని నిర్ణయించింది. గతంలో పుస్తకాలు ఆలస్యంగా వచ్చేవి. ఈ సారి ముందుగానే పుస్తకాలను సరఫరా చేశారు.

ఉమ్మడి వరంగల్ జిల్లాలో 3,556 ప్రభుత్వ పాఠశాలల్లో 91,942 మంది విద్యార్థులు చదువుతున్నారు. వీరికి 15,90,736 పాఠ్యపుస్తకాలు అవసరం అని అంచనా వేశారు. ఈ పుస్తకాలను నేరుగా మండల కేంద్రాలకు తరలించి, అక్కడి నుంచి స్కూళ్లకు చేర్చి భద్రపరిచారు.

ఉపాధ్యాయ సంఘాల ప్రతినిధులు మాట్లాడుతూ, గతేడాది ప్రభుత్వ సహకారంతో 95 శాతం ఫలితాలు సాధించగలిగామని చెప్పారు. ఈ సంవత్సరం నగర ప్రాంతాల్లో విద్యార్థుల సంఖ్య పెరుగుతుందన్నారు. ప్రభుత్వం ప్రీ-నర్సరీ, డిజిటల్ పాఠాలు, డ్రోన్ టెక్నాలజీ వంటివి అందుబాటులోకి తెచ్చిందని, ప్రైవేట్ స్కూళ్లకు ధీటుగా బోధన చేస్తామన్నారు.

వరంగల్ నిల్వ కేంద్రంలో 2,56,000 పాఠ్యపుస్తకాలు అవసరం కాగా, ఇప్పటికే 2,26,000 పుస్తకాలు చేరాయని అధికారులు తెలిపారు. నెలాఖరు వరకు మిగిలిన పుస్తకాలు కూడా పాఠశాలలకు చేరుతాయన్నారు. పాఠశాల ప్రారంభం రోజున పిల్లలకు పుస్తకాలు అందుతాయని వెల్లడించారు.

తల్లిదండ్రులు ఈ నిర్ణయాన్ని స్వాగతించారు. పాఠ్యపుస్తకాలతో పాటు ప్రాథమిక వసతులు కూడా అందుబాటులో ఉంచాలని కోరారు.