తెలంగాణలో ఒక్కసారిగా వాతావరణ మార్పు.. 15 జిల్లాలకు ఆరెంజ్ అలర్ట్

తెలంగాణ రాష్ట్రంలో ఒక్కసారిగా వాతావరణం మారింది. ఉదయం వడగాలులతో అల్లాడిన ప్రజలకు సాయంత్రం వర్షాలు ఉపశమనం కలిగించాయి.

హైదరాబాద్ వాతావరణ శాఖ 15 జిల్లాలకు ఆరెంజ్ అలర్ట్ జారీ చేసింది. ఆదిలాబాద్, కొమరంభీం అసిఫాబాద్, మంచిర్యాల, నిర్మల్, నిజామాబాద్, జగిత్యాల, రాజన్న సిరిసిల్ల, కరీంనగర్, పెద్దపల్లి, నల్గొండ, సూర్యపేట, మహబూబాబాద్, వరంగల్, హనుమకొండ జిల్లాల్లో ఉరుములు, మెరుపులతో కూడిన భారీ వర్షాలు పడే అవకాశం ఉంది. మిగిలిన 19 జిల్లాలకు ఎల్లో అలర్ట్ ఇచ్చింది.

పలు ప్రాంతాల్లో ఇప్పటికే వర్షం నమోదైంది. కరీంనగర్ పట్టణం, హుజురాబాద్, సైదాపూర్, శంకరపట్నం మండలాల్లో ఉరుములతో వర్షం కురిసింది. వీణవంక, తిమ్మాపూర్, శ్రీరాంపూర్, సిరిసిల్ల, యల్లారెడ్డిపేట, చెన్నారావుపేట, నరసంపేట, దుగ్గొండి, నల్గొండ పట్టణం, కామారెడ్డి జిల్లాలో ఈదురుగాలులతో వర్షం పడింది.

ప్రీ మాన్సూన్ ప్రభావంతో ఉత్తర, తూర్పు తెలంగాణలో భారీ వర్షాలు పడ్డాయని వాతావరణ శాఖ తెలిపింది. నైరుతి ఋతుపవనాలు జూన్ 12 నుంచి 15 మధ్య తెలంగాణలోకి ప్రవేశించే అవకాశం ఉంది. ఈదురు గాలులు గంటకు 40-50 కి.మీ. వేగంతో వీచే అవకాశం ఉందని హెచ్చరించింది. రానున్న మూడు రోజుల్లో వర్షాలు కొనసాగుతాయి.

హైదరాబాద్ నగరంలో మధ్యాహ్నం తర్వాత మేఘావృతమైన వాతావరణం ఏర్పడుతుంది. తూర్పు జోన్లో రెండు గంటల్లో వర్షం పడే అవకాశం ఉందని అధికారులు తెలిపారు. వేడి నుంచి ప్రజలకు ఉపశమనం లభిస్తుందని వాతావరణ శాఖ పేర్కొంది.