ధాన్యం సాగులో తెలంగాణ దేశంలోనే తొలి స్థానం: మంత్రి ఉత్తమ్ కుమార్ రెడ్డి

సూర్యాపేట జిల్లా తిరుమలగిరిలోని MEPMA ధాన్యం కొనుగోలు కేంద్రాన్ని రాష్ట్ర వ్యవసాయ శాఖ మంత్రి ఉత్తమ్ కుమార్ రెడ్డి పరిశీలించారు. ఈ సందర్భంగా ఆయన మాట్లాడుతూ, దేశంలోనే ధాన్యం సాగులో తెలంగాణ మొదటి స్థానంలో ఉందని చెప్పారు.

ఈ యాసంగి సీజన్లో కేంద్ర ప్రభుత్వం రాష్ట్రం నుంచి 51 లక్షల మెట్రిక్ టన్నుల ధాన్యాన్ని కొనుగోలు చేసిందని, అదనంగా రాష్ట్ర ప్రభుత్వం మిగతా ధాన్యాన్ని కూడా కొనుగోలు చేసి మొత్తం 75 లక్షల మెట్రిక్ టన్నుల ధాన్యం సేకరించినట్లు ఆయన తెలిపారు. ఇందుకోసం రాష్ట్ర ప్రభుత్వం తన బడ్జెట్ నుంచి రుణాలు తీసుకుని ₹16,479 కోట్లు ఖర్చు చేసిందని పేర్కొన్నారు.

అకాల వర్షాలతో తడిసిన ధాన్యాన్ని కూడా మద్దతు ధరకే కొనుగోలు చేస్తున్నామని మంత్రి చెప్పారు. జూన్ 4వ తేదీలోపు జిల్లాల్లో ధాన్యం కొనుగోలు ప్రక్రియ పూర్తి చేయాలని అధికారులను ఆదేశించారు. తిరుమలగిరి తహసిల్దార్ కార్యాలయంలో ధాన్యం కొనుగోలుపై అధికారులతో సమీక్ష నిర్వహించారు.