ఒకే రాష్ట్రం, ఒకే కార్డు: తెలంగాణలో యూనిఫైడ్ వెల్ఫేర్ కార్డు పైలట్ ప్రారంభం

తెలంగాణ ప్రభుత్వం 'ఒకే రాష్ట్రం, ఒకే కార్డు' విధానంలో భాగంగా యూనిఫైడ్ వెల్ఫేర్ కార్డును ప్రవేశపెట్టనుంది. ఆధార్ కార్డు తరహాలో ప్రత్యేక యూనిక్ ఐడెంటిటీ నెంబర్తో ఈ డిజిటల్ కార్డు రూపొందిస్తారు. రాష్ట్రంలోని ప్రతి కుటుంబానికి ఈ కార్డు అందించనున్నారు.

పైలట్ ప్రాజెక్టుగా ప్రతి నియోజకవర్గంలో ఒక పట్టణ, ఒక గ్రామీణ ప్రాంతాన్ని ఎంపిక చేసి యూనిఫైడ్ కార్డులను పంపిణీ చేస్తారు. తెల్ల రేషన్ కార్డు దారులు, సామాజిక ఆర్థిక సర్వేలో నమోదైన పేద కుటుంబాలకు ఈ కార్డు ఉచితంగా ఇవ్వనున్నారు.

ఈ కార్డు ద్వారా 30కి పైగా ప్రభుత్వ శాఖల సమాచారం ఒకే చోట అందుబాటులో ఉంటుంది. డ్యూప్లికేట్ లబ్ధిదారులను గుర్తించే వ్యవస్థతో పాటు, AI ఆధారిత 360° సిటిజన్ ప్రొఫైలింగ్ ఉంటుంది. పెన్షన్లు, రేషన్, ఆరోగ్య శ్రీ, స్కాలర్‌షిప్స్, విద్యుత్ సబ్సిడీ వంటి వివరాలు ఈ సింగిల్ కార్డులో అనుసంధానం అవుతాయి.

వలస కార్మికుల పాస్‌పోర్ట్, వీసా సమాచారం కూడా ఈ కార్డులో నమోదు చేయనున్నట్లు ప్రభుత్వ వర్గాలు తెలిపాయి. కాగితాల రూపంలో ఉన్న వివిధ కార్డుల స్థానంలో ఈ స్మార్ట్ డిజిటల్ కార్డు వస్తోంది.

డ్యూప్లికేట్ లబ్ధిని అరికట్టడం, మధ్యవర్తులను తొలగించడం తమ ప్రధాన లక్ష్యమని ప్రభుత్వం పేర్కొంది. అర్హులైన పేదలకు తక్షణ సంక్షేమ ఫలాలు చేరేలా ఈ విధానం రూపొందించినట్లు వివరించింది.