అనుమతి లేకుండా విదేశీ పర్యటనలు: తెలంగాణ వీసీలపై విచారణ

తెలంగాణలోని కొందరు వైస్ ఛాన్సలర్లు ప్రభుత్వ అనుమతి లేకుండా విదేశీ పర్యటనలు చేశారని ఫిర్యాదులు అందాయి. ఈ నేపథ్యంలో ప్రభుత్వం అంతర్గత విచారణకు ఆదేశించింది.

విశ్వవిద్యాలయాల వైస్ ఛాన్సలర్లు విదేశీ పర్యటనకు వెళ్లాలంటే ముందే ప్రభుత్వ అనుమతి తీసుకోవాలి. వెళ్లే సమయంలో సీనియర్ అధికారికి ఇంచార్జ్ బాధ్యతలు అప్పగించాలి. కానీ ఇటీవల వెళ్లిన వీసీలు ఈ నిబంధనలు పాటించలేదని ఆరోపణలు వచ్చాయి.

ఒక వైస్ ఛాన్సలర్ విదేశీ పర్యటనలో నిర్ణీత పరిమితికి మించి ఖర్చు చేశారు. ఆ అదనపు బిల్లును ప్రభుత్వానికి సమర్పించారు. ఆర్థిక శాఖ పరిశీలనలో అనుమతి లేకుండా వెళ్లిన విషయం వెలుగులోకి వచ్చింది. అదనపు ఖర్చులను ప్రభుత్వం భరించబోదని స్పష్టం చేసింది. ఈ వ్యవహారంపై Chief Secretary ఆగ్రహం వ్యక్తం చేసినట్టు తెలుస్తోంది. సంబంధిత వీసీలపై చర్యలకు ప్రభుత్వం సిద్ధమైనట్టు సమాచారం.

మరోవైపు, మూడున్నర సంవత్సరాల తర్వాత అయిదు విశ్వవిద్యాలయాలకు executive committees నియమించారు. ఉస్మానియా, JNTU, శాతవాహన, తెలంగాణ యూనివర్సిటీ, డాక్టర్ BR అంబేద్కర్ Open University లకు ఈ నియామకాలు జరిగాయి. కాకతీయ యూనివర్సిటీకి ఇంతకు ముందే executive committee నియమించారు.

సచివాలయంలో యూనివర్సిటీలకు సంబంధించిన సమావేశాలు ఏర్పాటు చేసినప్పుడు కొందరు సిబ్బంది విశ్వవిద్యాలయాల నుంచి డబ్బులు వసూలు చేస్తున్నారని ప్రభుత్వ దృష్టికి వచ్చింది. ఒక యూనివర్సిటీ నుంచి ₹5,000, మరో యూనివర్సిటీ నుంచి ₹3,000 వసూలు చేసి తెల్ల కాగితంపై బిల్లు రాసి ఇచ్చారని ఆరోపణలు ఉన్నాయి. ప్రభుత్వ సమావేశాలకు ఇలాంటి చెల్లింపులు ఉండవని అధికారులు స్పష్టం చేశారు.

ప్రస్తుతం విశ్వవిద్యాలయాల్లో నిధుల వినియోగంపై విజిలెన్స్ దర్యాప్తు జరుగుతోంది.