మే 23 నుండి 30 వరకు తెలంగాణలో విత్తన వారోత్సవాలు

ప్రొఫెసర్ జయశంకర్ తెలంగాణ వ్యవసాయ విశ్వవిద్యాలయం (PJTSAU) మే 23 నుండి 30 వరకు విత్తన వారోత్సవాలు నిర్వహిస్తోంది. రాష్ట్ర వ్యవసాయ మంత్రి తుమ్మల నాగేశ్వరరావు ఈ వారోత్సవాలను ప్రారంభించారు.

రాష్ట్రంలోని 26 విశ్వవిద్యాలయ కేంద్రాల ద్వారా సుమారు 1,230 మెట్రిక్ టన్నుల నాణ్యమైన విత్తనాలు అందుబాటులో ఉంచారు. 50,000 మంది రైతులకు ఈ విత్తనాలు చేరవేయాలని విశ్వవిద్యాలయం లక్ష్యంగా పెట్టుకుందని VC జానయ్య తెలిపారు.

వరి, మక్క, కందులు, పెసలు, మినుములు, నువ్వులు, సోయాచిక్కుడు, ఆముదాలు, రాగులు వంటి పంటల విత్తనాలు అందుబాటులో ఉన్నాయి. వరి విత్తనాల్లో 1010 సాంబ మసూరి, తెలంగాణ సోన, కూనారం సన్నలు, జగిత్యాల వరకు మొత్తం 10 రకాలు అందిస్తున్నారు.

ప్రతి విత్తన కొనుగోలుదారునికి వాడకం సంబంధిత సాంకేతిక పత్రం మరియు అధికారిక రసీదు అందిస్తున్నారని అధికారులు తెలిపారు. నకలీ విత్తనాలతో రైతులు మోసపోకుండా ఉండేందుకు శాస్త్రవేత్తల పర్యవేక్షణలో తయారైన విత్తనాలే అందిస్తున్నారని పేర్కొన్నారు.

1979 లో కేంద్ర ప్రభుత్వం ప్రారంభించిన నేషనల్ సీడ్ ప్రాజెక్టులో PJTSAU ఐదు దశాబ్దాలుగా భాగస్వామిగా ఉంది. బ్రీడర్ సీడ్, ఫౌండేషన్ సీడ్ ఉత్పత్తిలో విశ్వవిద్యాలయం కీలక పాత్ర వహిస్తోంది. ఈ విత్తన వారోత్సవాలు రాష్ట్ర ప్రభుత్వం చేపట్టిన 99 రోజుల ప్రజాపాలన ప్రగతి ప్రణాళికలో భాగంగా నిర్వహిస్తున్నారు.