తెలంగాణలో ఓటర్ల జాబితా సవరణ: నేటి నుంచి సర్ ప్రక్రియ ప్రారంభం

తెలంగాణలో ఓటర్ల జాబితా ప్రత్యేక సమగ్ర సవరణ (ఎస్‌ఐ‌ఆర్) ప్రక్రియ నేటి నుంచి ప్రారంభమైంది. ఇది జూలై 24 వరకు కొనసాగుతుంది. ఈ ప్రక్రియలో బూత్ లెవెల్ ఆఫీసర్లు (బీఎల్ఓలు) ప్రతి ఇంటిని సందర్శించి ఓటర్ల వివరాలు సేకరిస్తారు.

కేంద్ర ఎన్నికల సంఘం జిల్లాల వారీగా ఓటర్ల పేరుతో రెండు ఎన్యుమరేషన్ పత్రాలను ముద్రించి సిద్ధం చేసింది. హైదరాబాద్ జిల్లాలో ఇంగ్లీష్ లో, మిగిలిన జిల్లాల్లో తెలుగులో పత్రాలు అందుబాటులో ఉంటాయి. బీఎల్ఓలు ప్రతిరోజూ కనీసం 50 ఇళ్లను సందర్శించి ఓటర్లకు ఫారాలు అందజేస్తారు. ఒక కుటుంబంలో ఎంతమంది ఓటర్లు ఉన్నా విడివిడిగా ఫారాలు ఇస్తారు.

ఓటర్లు ఆ ఫారాలను పూరించి తిరిగి ఇవ్వాలి. ప్రతి ఓటర్ కు రెండు పత్రాలు ఇవ్వబడతాయి. ఒకటి బీఎల్ఓ తీసుకుంటారు, రెండోది రసీదుగా ఇస్తారు. ఫారంలో పాస్‌పోర్ట్ సైజు ఫోటో, పుట్టిన తేదీ, ఆధార్ కార్డు నెంబర్, ఫోన్ నెంబర్, తల్లిదండ్రుల వివరాలు వంటి వివరాలు నింపాలి. జూలై 24 లోపు పూర్తి చేసిన ఫారాలను బీఎల్ఓలకు అందించాలి. బీఎల్ఓలు వాటిని పరిశీలించి ఓటును నిర్ధారిస్తారు.

ఈ ఫారాలను ఆన్‌లైన్ లో కూడా నింపొచ్చు. ఎన్నికల సంఘం అధికారిక వెబ్‌సైట్‌లో ఈ సౌకర్యం ఇవాళ్టి నుంచి అందుబాటులో ఉంటుంది. గతంలో రిజిస్టర్ చేసుకున్న మొబైల్ నెంబర్, ఎపిక్ కార్డు నెంబర్ సాయంతో లాగిన్ అవ్వాలి. ఆధార్ కార్డులో ఉన్న పేరు ఓటరు జాబితాలోని పేరుతో సరిపోతేనే ఈ ఆన్‌లైన్ సదుపాయం ఉపయోగించుకోవచ్చు.

ఫారాలు నింపడంలో సందేహాలు ఉంటే, లేదా బీఎల్ఓ ఇంటికి రాకపోతే, 1950 టోల్ ఫ్రీ నెంబర్‌కు కాల్ చేసి సమాచారం ఇవ్వవచ్చు. ఎన్యుమరేషన్ పత్రం ఇచ్చే సమయంలో బీఎల్ఓల దగ్గర మ్యాపింగ్ వివరాలు ఉంటాయి, దాని ప్రకారం ఎలా నింపాలో వారు వివరిస్తారు. ఈ సర్ ప్రక్రియ ప్రారంభమవడంతో రాష్ట్రంలోని ప్రధాన రాజకీయ పార్టీలు రంగంలోకి దిగాయి. క్షేత్ర స్థాయిలో బూట్ లెవెల్ ఏజెంట్లతో సమన్వయం చేసుకోవాలని బీఎల్ఓలకు అధికారులు సూచించారు.