తెలంగాణలో ఉష్ణోగ్రతలు తగ్గుముఖం: 10 జిల్లాల్లో వర్షాలు పడే అవకాశం

తెలంగాణ రాష్ట్రంలో ఉష్ణోగ్రతలు క్రమంగా తగ్గుముఖం పడుతున్నాయని వాతావరణ శాఖ సీనియర్ అధికారి శ్రీనివాస్ తెలిపారు. మే 20వ తారీకు నుంచి రాష్ట్రంలో పలు ప్రాంతాల్లో హీట్ వేవ్ పరిస్థితులు కొనసాగుతున్నాయని, ఇటీవల కాలంలో 45 నుంచి 46 డిగ్రీల వరకు నమోదైన గరిష్ట ఉష్ణోగ్రతలు ప్రస్తుతం 42 నుంచి 43 డిగ్రీల మధ్య ఉన్నాయని వివరించారు.

ఉత్తర తెలంగాణ, ఈశాన్య తెలంగాణ, తూర్పు తెలంగాణ ప్రాంతాల్లో ఇంకా 41 నుంచి 44 డిగ్రీల వరకు ఉష్ణోగ్రతలు కొనసాగుతున్నాయని తెలిపారు. పశ్చిమ తెలంగాణ, దక్షిణ తెలంగాణ ప్రాంతాల్లో వర్షాలు పడటంతో అక్కడ ఉష్ణోగ్రతలు 36 నుంచి 40 డిగ్రీల వరకు తగ్గాయని పేర్కొన్నారు. హైదరాబాద్ లో నిన్న గరిష్టంగా 43.5 డిగ్రీలు ఖమ్మంలో రికార్డయిందని వెల్లడించారు.

విదర్భ నుంచి రాయలసీమ మీదుగా తెలంగాణపై ఒక ద్రోణి ఏర్పడిందని, దీనివల్ల పశ్చిమ దిక్కు నుంచి తేమ గాలులు వచ్చే అవకాశం ఉందని అధికారి వివరించారు. ఈరోజు కామారెడ్డి, మెదక్, సంగారెడ్డి, మహబూబ్ నగర్, నాగర్కర్నూల్ జిల్లాల్లో కొద్దిపాటి జల్లులు పడే అవకాశం ఉందని తెలిపారు. రేపు పశ్చిమ జిల్లాలు, ఉత్తర తెలంగాణ, హైదరాబాద్, వరంగల్ ప్రాంతాల్లో వర్షాలు కురిసే అవకాశం ఉందన్నారు. ఎల్లుండి నుంచి రాష్ట్రవ్యాప్తంగా దాదాపు అన్ని జిల్లాల్లో ఉరుములు మెరుపులతో కూడిన జల్లులు పడే అవకాశం ఉందని వెల్లడించారు.

ఉష్ణోగ్రతలు అధికంగా ఉన్న ప్రాంతాల్లో వర్షాలు పడినప్పుడు ఈదురు గాలులు, ఉరుములు, మెరుపులు, కొన్ని చోట్ల రాళ్ల వర్షం పడే అవకాశం ఉందని హెచ్చరించారు. నైరుతి రుతుపవనాలు కేరళను తాకిన తర్వాత 10 నుంచి 12 రోజుల వ్యవధిలో అంటే జూన్ 14 నుంచి 16వ తారీకు సమయంలో తెలంగాణలోకి ప్రవేశించే అవకాశం ఉందని తెలిపారు. జూన్ నెలలో మిశ్రమ వాతావరణ పరిస్థితులు ఉంటాయని, ప్రజలు తగిన జాగ్రత్తలు తీసుకోవాలని సూచించారు.