హైదరాబాద్‌లో ఐదు ఫెర్టిలిటీ సెంటర్లకు మహిళా కమిషన్ నోటీసులు

హైదరాబద్‌లో అండాల అక్రమ సేకరణ కేసుకు సంబంధించి ఐదు ఫెర్టిలిటీ సెంటర్లకు తెలంగాణ మహిళా కమిషన్ నోటీసులు జారీ చేసింది. ఈ సెంటర్ల నిర్వాహకులు విచారణకు హాజరుకావాల్సిందిగా కమిషన్ ఆదేశించింది.

నోటీసులు అందిన సెంటర్లలో ఇందిరా IVF సెంటర్, నర్మదా ఫెర్టిలిటీ సెంటర్, వయాసిస్ ఫెర్టిలిటీ సెంటర్, సద్గురు ART సెంటర్, పద్మజా ఫెర్టిలిటీ సెంటర్ ఉన్నాయి. ఈరోజు ఉదయం 11:30 గంటలకు హైదరాబాద్‌లోని మహిళా కమిషన్ కార్యాలయంలో విచారణకు హాజరుకావాలని కమిషన్ చైర్‌పర్సన్ తెలిపారు.

గత కొన్ని రోజులుగా హైదరాబాద్‌లో అండాల అక్రమ సేకరణ వ్యవహారం వెలుగులోకి వచ్చింది. ఈ కేసు నేపథ్యంలో మహిళా కమిషన్ కొన్ని హాస్టళ్లను సందర్శించి అక్కడి మహిళల పరిస్థితిని పరిశీలించింది. అండాల సేకరణలో ART సెంటర్ల పాత్ర కీలకంగా ఉందని కమిషన్ గమనించింది.

వైద్య ఆరోగ్య శాఖ అధికారులు కూడా ఈ సెంటర్లలో తనిఖీలు చేశారు. అయితే ఆ తనిఖీల్లో వెల్లడైన వివరాలను శాఖ ఇప్పటికీ ప్రకటించలేదు.

ఐదు సెంటర్ల నిర్వాహకుల వివరణ తీసుకున్న తర్వాత మహిళా కమిషన్ తదుపరి చర్యలు తీసుకోనుంది. విచారణ వివరాలతో ప్రభుత్వానికి నివేదిక అందించనుంది. మహిళలను టార్గెట్ చేసి అండాలు సేకరించినట్లు పోలీసులు ఇప్పటికే గుర్తించారు.