రాజ్యసభ తెలుగు ఎంపీల్లో తొమ్మిది మందికి ₹100 కోట్లకు పైగా ఆస్తులు: ADR నివేదిక

రాజ్యసభలో తెలుగు రాష్ట్రాలకు ప్రాతినిధ్యం వహిస్తున్న 18 మంది ఎంపీల్లో తొమ్మిది మందికి ₹100 కోట్లకు పైగా ఆస్తులు ఉన్నట్లు తేలింది. ఈ వివరాలు అసోసియేషన్ ఫర్ డెమోక్రటిక్ రిఫార్మ్స్ (ADR) నివేదికలో వెల్లడయ్యాయి. ఈ తొమ్మిది మందిలో తెలంగాణ నుంచి నలుగురు, ఆంధ్రప్రదేశ్ నుంచి ఐదుగురు ఉన్నారు.

దేశంలోనే అత్యంత సంపన్న రాజ్యసభ ఎంపీగా BRS నేత బండి పార్థసారథి రెడ్డి నిలిచారు. ఆయన ఆస్తుల విలువ ₹5,300 కోట్లుగా నమోదయ్యాయి. కాంగ్రెస్ ఎంపీ అభిషేక్ మను సింగ్వీ ₹1,058 కోట్లతో రెండో స్థానంలో ఉన్నారు.

తెలుగు రాష్ట్రాల 100 కోట్ల క్లబ్బులోని మిగతా ఎంపీల ఆస్తులు ఇలా ఉన్నాయి. బాష్యం రామకృష్ణకు ₹672 కోట్లు, మేడా రఘునాథ్ రెడ్డికి ₹475 కోట్లు, బీదా మస్తాన్ రావుకు ₹264 కోట్లు ఉన్నాయి. లింగమనేని రమేష్‌కు ₹213 కోట్లు, రేణుక చౌదరికి ₹178 కోట్లు ఉన్నాయి. దివకొండ దామోదర్ రావుకు ₹124 కోట్లు, వైవి సుబ్బారెడ్డికి ₹118 కోట్ల ఆస్తులు ఉన్నాయి.

తెలుగు ఎంపీల్లో అత్యల్ప ఆస్తులు BJP సభ్యుడు ఆర్ కృష్ణయ్యకు నమోదయ్యాయి. ఆయన ఆస్తుల విలువ ₹6 కోట్లు. రాష్ట్రాల వారీగా చూస్తే తెలంగాణ ఎంపీల మొత్తం ఆస్తులు ₹8,310 కోట్లతో దేశంలోనే మొదటి స్థానంలో ఉన్నాయి. ఆంధ్రప్రదేశ్ ఎంపీల మొత్తం ఆస్తులు ₹1,949 కోట్లతో నాలుగో స్థానంలో ఉన్నాయి. దేశవ్యాప్తంగా 230 మంది రాజ్యసభ సభ్యుల మొత్తం ఆస్తులు ₹26,508 కోట్లు కాగా, సగటున ఒక్కో ఎంపీకి ₹115.25 కోట్లు ఉన్నాయి.

అప్పుల విషయంలోనూ ఐదుగురు తెలుగు ఎంపీలు టాప్ 10లో ఉన్నారు. బాష్యం రామకృష్ణపై ₹200 కోట్ల అప్పులు ఉండగా, ఇది దేశంలో రెండో అత్యధికం. 230 మంది ఎంపీల్లో 72 మందిపై క్రిమినల్ కేసులు ఉన్నాయి. ఇది మొత్తం సభ్యుల్లో దాదాపు 31%. వీరిలో 10 మంది తెలుగు రాష్ట్రాలకు చెందినవారు. రాజ్యసభలో మహిళా ఎంపీలు 36 మంది మాత్రమే ఉన్నారు. ఇది మొత్తం సభ్యుల్లో 16%.