ఆదాయపు పన్ను చెల్లింపుల్లో తెలుగు రాష్ట్రాలు దేశంలో నాలుగో స్థానం

గత ఆర్థిక సంవత్సరంలో ఆంధ్రప్రదేశ్, తెలంగాణ రాష్ట్రాలు దేశంలోనే నాలుగవ అత్యధిక ఆదాయపు పన్ను చెల్లింపులు చేసినట్లు ఇన్కమ్ ట్యాక్స్ అధికారులు తెలిపారు. ఈ రెండు రాష్ట్రాల నుంచి కలిపి సుమారు ₹25,000 కోట్ల ఆదాయపు పన్ను వసూలైంది.

ఈ వివరాలను తెలంగాణ, ఏపీ ఆదాయపు పన్ను విభాగం కమిషనర్లు వెల్లడించారు. సికింద్రాబాద్‌లోని ఒక హోటల్‌లో ట్యాక్స్ బార్ అసోసియేషన్ నిర్వహించిన బహిరంగ చర్చా కార్యక్రమంలో వారు ఈ గణాంకాలు ఇచ్చారు. అసోసియేషన్ అధ్యక్షుడు సీఏ చంద్రశేఖర్ వేముల అధ్యక్షతన జరిగిన ఈ సమావేశంలో కమిషనర్లు నూతన సభ్యుల డైరెక్టరీని కూడా ఆవిష్కరించారు.

గతేడాదితో పోలిస్తే తెలుగు రాష్ట్రాల్లో ఆదాయపు పన్ను వసూళ్లు 12-13 శాతం పెరిగాయని అధికారులు చెప్పారు. ఈ ఏడాది మరో 10-15 శాతం పెరుగుదల లక్ష్యంగా ఉన్నట్లు తెలిపారు. దేశాభివృద్ధిలో ఈ పన్ను చెల్లింపులు కీలక పాత్ర పోషిస్తున్నాయని వారు అన్నారు.

ఈ సమావేశంలో 200 మందికి పైగా ట్యాక్స్ బార్ సభ్యులు హాజరై అధికారులతో చర్చించారు. ఎగ్జంప్షన్లు, అంతర్జాతీయ పన్ను విధానం, ట్రాన్స్‌ఫర్ ప్రైసింగ్ వంటి అంశాలపై చర్చ జరిగింది. ప్రతి పన్ను చెల్లింపుదారుడూ సకాలంలో పన్ను చెల్లించి దేశ ప్రగతికి సహకరించాలని కమిషనర్లు విజ్ఞప్తి చేశారు.